Shpëtim Qorraj pas garës në New York: Suksesi im qëndron te mbështetja e madhe e bashkatdhetarëve

Kandidati shqiptaro-amerikan nga radhët e demokratëve, Shpëtim Qorraj, ka bërë një bilanc të pjesëmarrjes së tij në zgjedhjet e mesmandatit në shtetin e New Yorkut. Ndonëse nuk arriti të sigurojë fitoren, ai e vlerëson këtë përvojë si një arritje të rëndësishme politike. Në një prononcim për emisionin “Rubikon”, Qorraj bëri të ditur se në distriktin 64 të Staten Island, zonë e konsideruar historikisht si bastion i republikanëve, ai arriti të sigurojë 40 për qind të votave. Sipas tij, ky rezultat është domethënës duke pasur parasysh konfigurimin politik të zonës. Qorraj nënvizoi se fushata e tij, e cila zgjati rreth 11 muaj, shërbeu për të ndërtuar ura lidhëse me komunitetin shqiptar dhe emigrantët e tjerë në SHBA. “Përtej numrave, unë fitova zemrat e njerëzve. Mbështetja që mora nga bashkëkombësit tanë dhe emigrantët e tjerë është vlerësimi më i madh për mua”, u shpreh ai. Duke analizuar zhvendosjen e votës shqiptare në raport me Partinë Republikane dhe ish-presidentin Donald Trump, Qorraj vërejti se trendi ka pësuar ndryshime të dukshme gjatë dy viteve të fundit. Ai beson se retorika dhe politikat e ndjekura nga Trump, veçanërisht ato që prekin drejtpërdrejt komunitetet e emigrantëve, kanë ndikuar në këtë ripozicionim të elektoratit. Në analizën e tij, kandidati demokrat theksoi se kriza ekonomike mbetet shqetësimi kryesor i qytetarëve amerikanë. Ai përmendi rritjen e kostos së jetesës, duke u ndalur te çmimet e larta të karburanteve, produkteve ushqimore dhe tregut të patundshmërive, faktorë këta që po ndikojnë negativisht në mirëqenien e familjeve dhe po vështirësojnë standardin e jetesës në SHBA.