Diplomacia nën kritika: Opozita akuzon qeverinë për nepotizëm dhe rehati familjare në ambasada

Vala e fundit e emërimeve në shërbimin diplomatik të Kosovës ka shkaktuar reagime të ashpra nga partitë opozitare, të cilat e kanë akuzuar pushtetin për shndërrimin e ambasadave dhe konsullatave në hapësira për akomodimin e familjarëve dhe aktivistëve partiakë. Në qendër të këtyre kritikave është vënë ministri i Punëve të Jashtme dhe Diasporës, Glauk Konjufca, nga i cili opozita ka kërkuar llogaridhënie të menjëhershme. Deputetja e Partisë Demokratike të Kosovës (PDK), Ariana Musliu-Shoshi, i është drejtuar drejtpërdrejt ministrit Konjufca, duke i bërë thirrje që të ndalë praktikën e punësimit të nipave dhe mbesave në institucionet diplomatike. Sipas saj, diplomacia duhet të udhëhiqet nga parimet e meritokracisë dhe profesionalizmit, duke theksuar se shërbimi i jashtëm i takon shtetit dhe interesit publik, e jo agjendave partiake apo lidhjeve farefisnore. Edhe Aleanca për Ardhmërinë e Kosovës (AAK) ka ngritur dyshime serioze mbi këto zhvillime. Kjo parti ka kërkuar sqarime nëse është shfuqizuar Vendimi nr. 113/2024, i nënshkruar më 23 prill 2024 nga ish-ministrja Donika Gërvalla, i cili parashihte ndalimin e punësimit të familjarëve të afërt të zyrtarëve në MPJD. AAK-ja konsideron se shpërfillja e këtij vendimi dhe emërimet e reja nënshkruar nga Konjufca përbëjnë një tradhti ndaj diplomatëve të karrierës dhe profesionistëve të rinj. Në listën e emërimeve të kontestuara, opozita ka përmendur emra specifikë, duke pretenduar se ata gëzojnë lidhje të afërta me figura të pushtetit. Bëhet fjalë për Rina Dragidellën (mbesa e ministrit Xhelal Sveçla) në Uashington, Kaltrina Dalipin në Berlin, Vera Rexhepi Lecin në Ioëa, Lumturie Lipovecin – tezja e deputetes së VV-së, Krenare Çerkini – në Hagë, si dhe Njazi Ajvazin, ish-anëtar i Kryesisë së Listës Guxo, i emëruar në Kopenhagë. Opozita ka paralajmëruar se nuk do të qëndrojë duarkryq përballë asaj që e cilëson si kapje të diplomacisë. Ata kanë kërkuar përgjigje zyrtare mbi kriteret e përzgjedhjes së këtyre personave dhe kanë theksuar se do të vazhdojnë të kërkojnë transparencë të plotë për çdo vendim që cenon integritetin e përfaqësimit të Kosovës në arenën ndërkombëtare.