Tragjedia në Elbasan: Gjendet trupi i pajetë i 69-vjeçarit nën rrënoja, shkon në dy numri i viktimave

Bilanci i shpërthimit të fuqishëm që tronditi mesditën e së mërkurës lagjen “Beqir Dardha” në Elbasan është rënduar, pasi ekipet e kërkim-shpëtimit kanë nxjerrë nga rrënojat trupin e pajetë të 69-vjeçarit Hamit Ibro. Ai rezultonte i humbur që prej momentit kur ndodhi ngjarja, ndërsa operacioni i forcave të specializuara të Forcave të Armatosura zgjati për disa orë. Shpërthimi shkatërrimtar, i cili ndodhi brenda një apartamenti, ka shkaktuar dëme strukturore kolosale në pallatin pesëkatësh. Forca e shpërthimit ishte aq e madhe saqë ka shembur muret e banesës dhe shkallët e godinës, duke bërë që tre kate të ndërtesës të pësojnë dëmtime të rënda dhe të bashkohen në një hapësirë të vetme. Kjo ngjarje e rëndë ka shënuar edhe një viktimë tjetër, një 82-vjeçare që jetonte në apartamentin ngjitur me vendin ku ndodhi shpërthimi. Ndërkohë, 10 persona të tjerë, të cilët shfaqën shenja asfiksie për shkak të tymit dhe pluhurit, u dërguan menjëherë në spital për ndihmë mjekësore dhe fatmirësisht janë jashtë rrezikut për jetën. Pas vlerësimit të dëmeve, autoritetet e kanë shpallur pallatin si të pabanueshëm për shkak të rrezikut të shembjes. Ekipet e emergjencës kanë realizuar evakuimin e banorëve, ndërsa po punohet për gjetjen e një strehimi të përkohshëm për ta. Ndonëse hetimet janë në fazë fillestare për të përcaktuar shkakun e saktë të kësaj tragjedie, dyshimet e para të grupit hetimor orientojnë pistën drejt një shpërthimi të mundshëm nga një bombol gazi.