Tragjedia në Elbasan: Gjendet trupi i pajetë i 69-vjeçarit nën rrënojat e pallatit

Bilanci i tragjedisë së ndodhur mesditën e së mërkurës në lagjen “Beqir Dardha” të Elbasanit është rënduar, pasi ekipet e kërkim-shpëtimit të Forcave të Armatosura kanë nxjerrë nga rrënojat trupin e pajetë të viktimës së dytë. Bëhet fjalë për 69-vjeçarin Hamit Ibro, i cili ishte shpallur i humbur që prej momentit kur shpërthimi i fuqishëm goditi pallatin 5-katësh. Pas orësh të tëra kërkimesh intensive nën mbetjet e godinës, efektivët arritën të gjenin trupin e të moshuarit. Kujtojmë se nga ky shpërthim i rëndë humbi jetën edhe një 82-vjeçare, e cila jetonte në banesën ngjitur me apartamentin ku ndodhi ngjarja. Forca e shpërthimit ishte aq e madhe sa shkaktoi shembjen e mureve dhe shkallëve, duke shkaktuar dëme strukturore të tilla që bënë që tre kate të ndërtesës të shkrihen në një. Përveç humbjeve të jetëve, ngjarja la pas edhe 10 persona të lënduar, të cilët shfaqën probleme me asfiksinë. Ata u dërguan menjëherë për ndihmë mjekësore në spital dhe fatmirësisht janë jashtë rrezikut për jetën. Godina është shpallur zyrtarisht e pabanueshme për shkak të dëmeve kolosale të shkaktuara. Autoritetet përkatëse kanë kryer evakuimin e banorëve dhe po punojnë për të siguruar strehimin e tyre, ndërkohë që hetimet vazhdojnë për zbardhjen e plotë të rrethanave. Dyshimet e para të grupit hetimor për shkakun e këtij shpërthimi tragjik mbeten ato të një rrjedhjeje nga bombola e gazit.