Saipi: Ndaj Izraelit duhet të tregojmë një reagim edhe për tifozët, e di që kemi mjaftueshëm cilësi në skuadër

Portieri i Kombëtares së Kosovës, Amir Shaipi, ka kërkuar reagim nga “Dardanët” pas humbjes ndaj Austrisë, duke theksuar se skuadra duhet të përqendrohet maksimalisht për ta fituar përballjen e radhës me Izraelin. Në një prononcim për faqen zyrtare të Federatës së Futbollit të Kosovës (FFK), Shaipi analizoi gabimet e bëra në ndeshjen ndaj Austrisë, duke veçuar mungesën e agresivitetit në mesfushë dhe hapësirat e lejuara për kundërshtarin. “Në mesfushë nuk ishim mjaftueshëm agresiv për topat e dytë. U lamë shumë hapësirë atyre. E dinim që ata luajnë më shpejt dhe mendoj se kjo ishte arsyeja kryesore”, u shpreh Shaipi. Portieri i Kosovës kërkoi reagim në ndeshjen ndaj Izraelit, duke theksuar se skuadra ka cilësinë e nevojshme për të marrë pikët e plota dhe për t’u dëshmuar tifozëve se është një ekip i fortë. “Izraeli? Sigurisht, kërkoj një reagim. Duhet të tregojmë një reagim edhe për tifozët, ndaj njerëzve të Kosovës, që jemi një ekip i fortë. E di që kemi mjaftueshëm cilësi në skuadër”. “Mund t’i mposhtim edhe këta kundërshtarë. Prandaj, duhet të reagojmë dhe të hyjmë në ditën e ndeshjes me përqendrim 100 për qind”, deklaroi ai.