Fenomeni me flokët e gjata: Futbollisti që detyroi gjyqtarin të ndëshkojë dy kundërshtarë me karton të kuq

Një rast i rrallë dhe mjaft i diskutuar ka ndodhur në Ligën e Kombeve të Concacaf, ku futbollisti Aedan Scipio është kthyer në sensacionin e rrjeteve sociale. Për shkak të pamjes së tij të veçantë, ai arriti të bëhet protagonist i një ngjarjeje të pazakontë, duke shkaktuar përjashtimin e dy lojtarëve kundërshtarë brenda një ndeshjeje të vetme. Në përballjen mes Anguillas dhe Antigua e Barbudës, e cila përfundoi me fitoren 5-0 të këtyre të fundit, 36-vjeçari Scipio hyri në fushë në minutën e 68-të. Lojtari i Roaring Lions, i cili njihet për dredhat e tij jashtëzakonisht të gjata që i arrijnë deri te këmbët, u bë shënjestër e dy ndërhyrjeve të palejuara nga Keon Greene dhe Shalon Knight. Kjo është hera e parë në histori që dy futbollistë ndëshkohen me karton të kuq në të njëjtin takim për shkak të tërheqjes së flokëve. Incidentet ndodhën kur Greene dhe më pas Knight u përpoqën të ndalonin Scipion duke kapur flokët e tij, veprime këto që u vlerësuan nga gjyqtari si sjellje e dhunshme, duke lënë Antigua dhe Barbudën me nëntë lojtarë në fushë deri në vërshëllimën finale. Tërheqja e flokëve në futboll është një çështje që ka shkaktuar debate të shumta kohët e fundit, veçanërisht pas rasteve të ngjashme në Premierligë, ku lojtarë si Michael Keane, Dan Ballard dhe Lisandro Martinez janë ndëshkuar për veprime të ngjashme. Sipas rregullores së futbollit, një gjest i tillë klasifikohet si sjellje e dhunshme dhe zakonisht pason me pezullim prej tri ndeshjesh. Edhe pse në disa liga janë vendosur udhëzime më specifike për të dalluar intensitetin e tërheqjes, rastet e mëparshme në Angli kanë treguar se apelimet për anulimin e kartonëve të kuq shpeshherë refuzohen nga panelet disiplinore. Në rastin e Scipios, pamjet filmike të incidenteve janë shpërndarë me shpejtësi, duke e bërë futbollistin të cilësohet nga tifozët si një “kod mashtrimi” i gjallë në fushën e blertë.