Tragjedia në fushë, mbrojtësi i Andorrës del në mbrojtje të portierit Owono: E dimë sa shumë po vuan

Futbollisti i FC Andorrës, Lautaro Spatz, ka thyer heshtjen përmes një letre publike pas aksidentit fatal në ndeshjen kundër Tenerifes, ku ndërroi jetë sulmuesi Jesús de Miguel. Mbrojtësi nga Argjentina, i cili ndodhej në fushë gjatë ngjarjes tragjike dhe ishte ndër të parët që ndihmoi futbollistin e dëmtuar, ka ndarë dhimbjen e thellë për këtë humbje dhe ka shprehur mbështetjen e palëkundur për portierin e skuadrës, Jesús Owono. Spatz theksoi se e gjithë skuadra është e shkatërruar emocionalisht nga kjo ngjarje e rëndë, duke e cilësuar atë si një fatkeqësi të paimagjinueshme që ka ndodhur brenda perimetrit të fushës së blertë. “Dua t’i kushtoj disa fjalë edhe bashkëlojtarit, portierit dhe mikut tim, i cili është thellësisht i prekur nga ajo që ndodhi. Ata që e njohin e dinë çfarë personi është, sa shumë po vuan dhe se kurrë nuk do të kishte dashur t’i shkaktonte dëm askujt”, shkroi ndër të tjera ai. Lojtari shtoi se ndonëse incidentet e papritura janë pjesë e lojës, askush nuk ka mundur ta parashikojë se një aksion i zakonshëm do të shndërrohej në një ngjarje me pasoja fatale. “Sot futbolli nuk ka rëndësi. Mbetet vetëm të ndajmë dhimbjen, të tregojmë respektin më të madh dhe t’i dërgojmë gjithë forcën familjes dhe të gjithë atyre që po vuajnë nga kjo humbje e tmerrshme. Pusho në paqe, Demi”, përfundoi Spatz mesazhin e tij prekës.