Zgjedhjet në SHBA: Gjashtë personalitete shqiptare në garë, ja kush arriti të sigurojë triumfin

Gjatë zgjedhjeve të mesmandatit në Shtetet e Bashkuara të Amerikës, gjashtë garues me origjinë shqiptare u bënë pjesë e procesit zgjedhor, duke synuar pozicione të rëndësishme në skenën politike amerikane. Bëhet fjalë për Shpëtim Qorraj, Diamant Hysenaj, Peter Lumaj, Alma Sarelli Shkreli, Joe Hoxha dhe Edlira Sako. Ndërsa katër prej tyre nuk arritën të siguronin mandatin e dëshiruar, procesi për kandidatët Sako dhe Joe Hoxha mbetet ende i hapur deri në finalizimin e të gjitha numërimeve. Por cilat ishin fushatat, profilet dhe partitë që mbështetën këta shqiptarë të përfshirë në politikën transatlantike? Shpëtim Qorraj, me origjinë nga Kosova dhe dali i dëshmorit të Ushtrisë Çlirimtare të Kosovës, Mustafë Qorraj, kandidoi nën siglën e Partisë Demokratike për një ulëse në Asamblenë e shtetit të New Yorkut, në distriktin e 64-t (Staten Island dhe Brooklyn). Ai arriti të grumbullonte 39.3 për qind të votave, duke u përballur me republikanin Michael Tannousis. Qorraj, i cili është zhvendosur nga Kosova drejt SHBA-së në vitin 2011, kishte në fokus të fushatës së tij uljen e shpenzimeve të jetesës, sigurimin e strehimit të përballueshëm, zhvillimin e transportit, fuqizimin e sigurisë, arsimin publik dhe dhënien e mbështetjes për ndërmarrjet e vogla. Në të njëjtin shtet, Diamant Hysenaj hyri në garë si kandidat për Kongresin Amerikan në Distriktin e 14-t të New Yorkut, përballë figures së njohur Alexandria Ocasio-Cortez. Ai mblodhi 21 për qind të votave në këtë përballje. Në shtetin e Connecticut, Peter Lumaj garoi nën ngjyrat e republikanëve për postin e sekretarit të shtetit, kundër Stephanie Thomas. Ai shënoi një rezultat të ndjeshëm me 332,084 vota, respektivisht 38.5%, megjithatë kjo nuk mjaftoi për t'i dhënë fitoren. Në po këtë shtet, Joe Hoxha, me origjinë nga Tirana, kandidori si republikan për Dhomën e Përfaqësuesve të Connecticut, përballë Nate Brown, ndërkohë që për të rezultatet zyrtare vijojnë të jenë në proces përpunimi. Gjithashtu në Connecticut, Alma Sarelli (Shkreli), me rrënjë nga Shkodra, garoi si kandidate republikane për senatin shtetëror. Edhe pse siguroi mbështetjen e Partive të Pavarura, ajo nuk mundi të siguronte triumfin përfundimtar. Në një situatë dinamike vijon të jetë edhe Edlira Sako, e cila vjen nga qyteti i Lushnjës. Ajo garon për demokratët si kandidate për Senatin e Michiganit, ndërsa tashmë e ka regjistruar një sukses të rëndësishëm pasi në primaret e Partisë Demokratike të mbajtura më 4 gusht 2026, ajo triumfoi me 52 për qind të votave përballë kundërshtarit brenda të njëjtit subjekt politik. Nga gjithsej gjashtë shqiptarë që morën pjesë në këtë garë elektorale, dy prej tyre përfaqësuan platformën e demokratëve, ndërsa pjesa tjetër rreshtua në krahun e republikanëve të udhëhequr nga Donald Trump.