Zhgënjim në Kinë, paraqitja më e dobët e Shqipërisë në historinë e Kampionatit Botëror të peshëngritjes

Kombëtarja kuqezi e peshëngritjes po kalon një nga momentet e saj më të vështira në skenën ndërkombëtare, duke regjistruar një ndër paraqitjet më të zbehta në historinë e Kampionateve Botërore, ngjarje kjo që po zhvillohet në qytetin Ningbo të Kinës. Delegacioni shqiptar është paraqitur në këtë aktivitet prestigjioz me katër sportistë, mirëpo deri më tani skuadra nuk ka mundur të lërë asnjë shenjë, duke u përfshirë në një paraqitje krejtësisht anonime. Seria e zhgënjimeve nisi me Briken Caljën, i cili u detyrua të hiqte dorë nga gara. Për shkak të një dëmtimi të pësuar vetëm 24 orë para provës në Baterinë C për peshat deri në 75 kg, ai njoftoi zyrtarisht tërheqjen e tij nga ky Botëror. Në të njëjtën kategori, fat të ngjashëm pati edhe Erkand Qerimaj. Sportisti 38-vjeçar, njëkohësisht konkurrenti më i moshuar në këtë kompeticion, nuk ia dolë dot të mbyllë me sukses sfidën e tij. Ai u ndal nga dështimi në të tria provat e stilit të shkëputjes me 147 kg, duke mbetur kështu jashtë klasifikimit në dygarësh. Përvojë sfiduese pati edhe për Enkileda Carjen, një ndër talentet më të spikatura të peshëngritjes shqiptare, e cila tashmë po mat forcat në kategorinë e të rriturave. Gara e saj në peshat 69 kg e la atë larg zonës së medaljeve, pasi u rendit e 19-ta në shkëputje me 102 kg, e 28-ta në shtytje me 121 kg, ndërsa dygarëshin e përmbylli në vendin e 20-të me një total prej 223 kg. Tashmë, e gjithë vëmendja dhe shpresat e fundit të kampit kuqezi janë përqendruar te Ertjan Kofsha. Shtangisti nga Shtërmeni do të ngjitet në pedanë mëngjesin e së mërkurës, rreth orës 08:30, për të garuar në Baterinë C të peshave 95 kg. Pavarësisht kësaj dalje të fundit në skenë, pritshmëritë për një medalje mbeten minimale, ndërsa Kombëtarja e shtangës vijon të mos gjejë ritmin e duhur në këtë Kampionat Botëror.