Tensione të reja: Teherani paralajmëron Evropën me sulme raketore nëse strehon bazat amerikane

Autoritetet iraniane kanë lëshuar një paralajmërim të ashpër drejtuar shteteve evropiane që strehojnë infrastrukturë ushtarake të Shteteve të Bashkuara, duke theksuar se një përplasje e re ushtarake mund të shtrihet deri në zemër të kontinentit të vjetër. Në një prononcim për Euronews, Ahmad Bakhshayesh Ardestani, anëtar i Komisionit të Sigurisë Kombëtare në Parlamentin iranian, u shpreh se nëse Uashingtoni shfrytëzon bazat e tij në Evropë, përfshirë ato në Itali dhe Gjermani, arsenali raketohet i Iranit do të kundërpërgjigjet drejtpërdrejt ndaj këtyre vendeve. Sipas Ardestanit, ndonëse një strategji e tillë nuk u zbatua gjatë konflikteve të kaluara, kësaj radhe Teherani nuk do të lejojë që mbështetja evropiane ndaj operacioneve amerikane të kalojë pa pasoja të rënda, duke shtuar se do të merren në shënjestër edhe asetet materiale e jomateriale të vendeve mbështetëse. Nga ana e tij, Fada Hossein Maleki, gjithashtu anëtar i komisionit parlamentar, bëri të ditur se Irani ka skicuar një qasje të re strategjike për çdo skenar lufte, e cila do të sjellë surpriza si për Uashingtonin, ashtu edhe për aleatët e tij evropianë. Zhvillimet vijnë në kuadër të shënimit të përvjetorit të marrjes së ambasadës amerikane në Teheran në vitin 1979, ngjarje e njohur si dita e rezistencës ndaj arrogancës globale. Trupat e Gardës Revolucionare Islamike (IRGC) publikuan një deklaratë ku premtojnë një reagim të menjëhershëm dhe pa kufizime gjeografike ndaj çdo lloj rreziku, duke iu referuar direktivave të atribuara Ajatollah Mojtaba Khameneit për përditësimin e listës së objektivave të armikut. Në shenjë proteste ndaj qëndrimit të Berlinit, aktivistë të organizatës studentore Basij nga Universiteti i Teheranit vendosën një banderolë pranë ambasadës gjermane me një citim të Mohsen Rezaei, ku paralajmërohej se Evropa do të mbajë koston e mbështetjes ndaj Izraelit. Për këtë çështje, diplomacia iraniane ka thirrur disa herë ambasadorin gjerman gjatë javëve të fundit. Edhe gazeta “Kayhan”, e cila vepron nën mbikëqyrjen e një përfaqësuesi të Khameneit, ritheksoi se hapësira e kundërpërgjigjes ushtarake nuk do të kufizohet vetëm në Lindjen e Mesme, por mund të përfshijë edhe territorin evropian, në përputhje me urdhrat për operacione pa kufizime gjeografike. Ndërkohë, në platformën X, Mohsen Rezaei deklaroi se përgjigjja e SHBA-së ndaj kërkesave iraniane ka qenë e pamjaftueshme, duke kërkuar përmbushjen e plotë të shtatë kushteve të Teheranit si parakusht për rihapjen e Ngushticës së Hormuzit. Nga ana tjetër, kryetari i Parlamentit iranian, Mohammad Bagher Ghalibaf, komentoi humbjen e republikanëve në zgjedhjet për Kongresin amerikan, duke vlerësuar se qytetarët e SHBA-së kanë votuar kundër luftës dhe se çdo shpërfillje e këtij vullneti nga ana e qeverisë amerikane do të ketë pasoja të rënda.