Super-talenti i Manchester United synon kalimin te Real Madridi

Gazetari i njohur sportiv, Fabrizio Romano, ka ndarë detaje të reja rreth situatës së 16-vjeçarit JJ Gabriel, i cili vlerësohet si një nga lojtarët e rinj më të talentuar në arenën ndërkombëtare dhe po afrohet gjithnjë e më shumë me një kalim te Real Madridi. Adoleshenti anglez, i pakënaqur me statusin e tij aktual te Manchester Unitedi, ka shprehur hapur dëshirën për të nisur një aventurë të re. Si lojtari ashtu edhe stafi i tij besojnë se një ndryshim ambienti është i domosdoshëm për vazhdimësinë e karrierës së tij, duke tërhequr vëmendjen e disa prej gjigantëve të kontinentit të vjetër. Edhe pse emra si Barcelona, Bayern Munich dhe Paris Saint-Germain janë përfolur në media për një transferim të mundshëm, madrilenët kanë qenë në pole position prej disa javësh. Romano ka sqaruar se ndonëse akordi final mes palëve ende nuk është zyrtarizuar, vetë lojtari ka kaluar disa ditë në kryeqytetin spanjoll së fundmi, ndërsa zyrtarizimi i marrëveshjes pritet të ndodhë gjatë muajit të ardhshëm. "Djali ka qëndruar në Madrid për disa ditë gjatë javëve të fundit. Ai po punon intensivisht për t'u përgatitur për janarin, kur do të ketë mundësi t'i bashkohet një skuadre të re," ka deklaruar Romano përmes platformës YouTube, duke vënë në pah rivalitetin mes Barcelonës dhe Realit për këtë talent. "Real Madridi mbetet favoriti kryesor për të siguruar shërbimet e JJ Gabrielit. Për momentin, pritshmëritë e të gjitha palëve të përfshira janë që JJ Gabriel të transferohet te Real Madridi. "Gjithmonë ju kam thënë se Spanja ishte destinacioni më i mundshëm për JJ Gabrielin dhe tani mund të themi se Real Madridi vazhdon të jetë klubi që prin në këtë garë," ka përfunduar gazetari italian.