Orinda Huta flet hapur: Beteja ime emocionale për një fëmijë të dytë përmes IVF-it

Këngëtarja e njohur shqiptare, Orinda Huta, ka ndarë me publikun një nga rrëfimet e saj më intime dhe sfiduese, duke treguar përpjekjet e saj për të zgjeruar familjen përmes metodës së fekondimit artificial (IVF). E ftuar në emisionin “Goca dhe Gra”, ajo zbuloi se pas katër tentativave zhgënjyese brenda vendit, ka vendosur t'i besojë një klinike të specializuar në Turqi. Ajo theksoi se pasioni dhe dëshira e saj dhe e bashkëshortit për të sjellë në jetë një fëmijë të dytë mbeten të pandryshuara. Sipas saj, për sa kohë që organizmi i jep mundësi dhe me besim të plotë në Zot, ajo nuk ka ndërmend të heqë dorë nga ky synim jetësor. Duke arsyetuar largimin drejt Turqisë, artistja pranoi se në Shqipëri është ndodhur përballë një mungese dëgjimi nga stafi mjekësor. Ajo u shpreh se trajtimi si një numër statistikor dhe jo si një paciente me nevoja unike e ka shtyrë drejt një zhgënjimi të thellë, sidomos pas dështimit të radhës më 30 dhjetor. “Po provoj dhe do të provoj akoma. Unë e dua shumë një fëmijë të dytë dhe, për sa kohë që trupi na e mundëson akoma dhe me lutje te Zoti, ajo do të ndodhë. Mendoj se nuk duhet të dorëzohemi,” u shpreh ajo gjatë rrëfimit prekës. Më tej, ajo shtoi: “Sot ka shumë vështirësi për gratë dhe nuk gjejnë përgjigje se pse po u ndodh kjo. Tani kam filluar të provoj në Turqi dhe po përpiqem atje. E provova katër herë në Shqipëri dhe nuk ia dola.” Duke u ndalur te zhgënjimet emocionale, Orinda shpjegoi: “Në momentin që nuk doja ta provoja më, sepse pata një zhgënjim herën e fundit, u ndjeva e padëgjuar… sepse ti fillon të kuptosh trupin tënd dhe bën pyetje, ndërsa doktori të thotë ‘Ja, kështu janë statistikat’, dhe ti fillon të kthehesh në një statistikë. Nuk mund të jetë i njëjti protokoll për çdo paciente.” Ajo kujtoi gjithashtu momentin e vështirë kur mori lajmin se procesi nuk kishte ecur siç duhej: “Ditën kur mora vesh që stimulimi nuk shkoi mirë, mbaj mend që ka qenë data 30 dhjetor. Mora telefonatën dhe më thanë ‘Orinda, nuk ia dola dot’.” Për ta marrë veten nga ky ngërç emocional, artistja tregoi se iu a desh plot një vit kohë, derisa një ftesë nga klinika turke e bindi që të provonte sërish. “Tani shpresojmë dhe, nëse Zoti nuk do, mos e sforco atë…”, përfundoi ajo fjalën e saj.