Prapaskena e bisedës telefonike me Putinin: Presidenti finlandez zbulon nismën e ndërmarrë nga Ukraina

Presidenti i Finlandës, Alexander Stubb, ka sqaruar se komunikimi i tij dhe i kryeministrit të Norvegjisë, Jonas Gahr Store, me kreun e Kremlin, Vladimir Putin, u ndërmarrë ekskluzivisht me kërkesë të autoriteteve në Kiev, të cilat synonin të krijonin një urë lidhëse komunikimi me Moskën. “Qëllimi kryesor ishte hapja e një kanali kontakti me kërkesë të vetë Ukrainës”, u shpreh Stubb, duke shtuar se partnerët e tjerë evropianë ishin të informuar paraprakisht mbi thelbin e kësaj bisede. Sipas kreut të shtetit finlandez, kjo shënoi rastin e parë që Bashkimi Evropian pranoi një mesazh të drejtpërdrejtë nga Rusia lidhur me konfliktin e armatosur në territorin ukrainas apo për zhvillimet e fundit në rajonin e Detit Baltik. Duke iu referuar një raportimi mediatik ku pretendohej se gjatë bisedës u diskutua mbi historinë e sllavëve, Stubb i hodhi poshtë këto pretendime, duke i cilësuar ato si “të pavërteta” dhe “informacione të pasakta”. Ai bëri të qartë gjithashtu se Helsinki zyrtar nuk është duke luajtur rolin e ndërmjetësit, por do të vijojë mbështetjen e palëkundur ndaj Ukrainës. Biseda telefonike mes Stubb, Store dhe Putin u zhvillua më 27 tetor. Gjatë këtij komunikimi, liderët shkëmbyen mendime rreth zgjidhjes së krizës ukrainase dhe përshëndetën dakordësinë për rinisjen e bisedimeve trepalëshe mes Rusisë, Ukrainës dhe Shteteve të Bashkuara, të planifikuara për t'u mbajtur në Abu Dhabi në pjesën e parë të muajit nëntor.