Ndryshimet për Bankën e Shqipërisë, Brukseli nis shqyrtimin e ligjit të ri dhe imunitetit të Guvernatorit

Komisioni Evropian ka dhënë qëndrimin e tij zyrtar lidhur me zhvillimet e fundit që prekin projektligjin për Bankën e Shqipërisë, me fokus të veçantë te neni 72 që garanton mbrojtje ligjore për kreun e këtij institucioni gjatë ushtrimit të funksioneve të tij. Në një prononcim për gazetarin e Euronews Albania, Thimi Samarxhiu, një zëdhënës i Komisionit Evropian konfirmoi se Brukseli zyrtar është njohur me ndryshimet e propozuara dhe aktualisht po e analizon dokumentin në kuadër të ecurisë së procesit integrues të Shqipërisë në Bashkimin Evropian. Gjatë shpjegimit të tij, përfaqësuesi i KE-së solli në vëmendje standardet evropiane, duke përmendur se krerët e bankave qendrore në vendet anëtare të BE-së gëzojnë mbrojtje dhe imunitete specifike, të përcaktuara qartë në Protokollin nr. 7 mbi privilegjet dhe imunitetet e Bashkimit Evropian. Sipas këtij institucioni ndërkombëtar, këto garanci ligjore lidhen ngushtësisht me vendimet dhe veprimet e ndërmarra nga drejtuesit e bankave gjatë kryerjes së detyrave të tyre zyrtare si pjesë e strukturave të Bankës Qendrore Evropiane. Në vijim të përgjigjes zyrtare, Komisioni Evropian theksoi: “Komisioni Evropian është në dijeni të ndryshimeve të fundit të bëra në nenin 72 të projektligjit për Bankën e Shqipërisë. Në kuadër të procesit të anëtarësimit të Shqipërisë në Bashkimin Evropian (Kapitulli 17), Komisioni po shqyrton projektligjin për Bankën e Shqipërisë. Guvernatorët e bankave qendrore kombëtare të vendeve anëtare të BE-së gëzojnë privilegjet dhe imunitetet e parashikuara në Protokollin nr. 7, mbi privilegjet dhe imunitetet e Bashkimit Evropian, për sa u përket veprimeve të kryera në ushtrimin e detyrës së tyre zyrtare si anëtarë të një organi të Bankës Qendrore Evropiane. Që nga data e anëtarësimit të Shqipërisë në Bashkimin Evropian, neni 72, që lidhet me mbrojtjen ligjore gjatë ushtrimit të detyrave, do të zbatohet pa cenuar privilegjet dhe imunitetet që guvernatori gëzon në bazë të Protokollit nr. 7”.