Vala e protestave nuk ndalet: Të shtunën kërkohet llogaridhënie institucionale për tragjedinë e Arlinda Zekajt

Kolektivi për Mendim dhe Veprim Feminist ka bërë të ditur se vala e protestave do të vijojë, me kërkesën e prerë për përgjegjësi nga ana e institucioneve lidhur me vrasjen e Arlinda Zekajt. Përmes një njoftimi zyrtar, është bërë e ditur se tubimi i radhës do të mbahet këtë të shtunë, duke filluar nga ora 17:00. “Protesta kombëtare vazhdon! Të shtunën në orën 17:00 mblidhemi sërish për të çuar përpara betejën tonë për drejtësi për Arlindën dhe për të gjitha gratë e humbura nga dhuna. Do të jemi në rrugë dhe sheshe çdo ditë, duke bllokuar institucionet derisa çdo kërkesë e jona të jetë plotësuar. Zëri ynë nuk do të ndalet dhe shteti do të mbajë përgjegjësi. Tubimi do të bëhet te sheshi 'Zahir Pajaziti', për të marshuar më pas drejt ndërtesës së Qeverisë së Kosovës dhe Këshillit Prokurorial. Ju bëjmë thirrje të dilni nga shtëpitë dhe t'i bashkoheni kauzës”, thuhet në thirrjen e këtij kolektivi. Arlinda Zekaj u privua nga jeta më 25 tetor, ngjarje kjo ku autor dyshohet të ketë qenë ish-kunati i saj, Albert Sylaj. Vlen të theksohet se, para se të ndodhte ngjarja fatale, e ndjera i ishte drejtuar me një letër kryeprokurores së Pejës, ku e njoftonte hapur se jeta e saj po përballej me rrezik serioz.