Përplasje në Kuvendin e Prishtinës: Debati për pauzën dhe orarin e faljes së xhumasë ndez tensionet

Një debat i ashpër verbal ka shpërthyer sot në sallën e Kuvendit Komunal të Prishtinës, ku kryesuesi Fehmi Kupina dhe anëtari i Kuvendit nga radhët e Lëvizjes Vetëvendosje, Besart Krasniqi, janë përplasur për shkak të kohës së caktuar për faljen e namazit të xhumasë. Ngjarja ka ndodhur rreth orës 11:10, në kohën kur po zhvilloheshin punimet e seancës. Kupina kishte kërkuar një ndërprerje prej 15 minutash me arsyetimin e vendosjes së një rendi të ri pune. Në atë moment, asamblisti Krasniqi i është afruar për t'i kërkuar mirëkuptim, duke i kujtuar se në orën 12:00 nis koha e namazit të xhumasë, ritual ky që besimtarët myslimanë e kryejnë çdo të premte. “Çka ka lidhje që keni xhuma? Unë nuk merrem me xhumanë e juve! ...Dilni e propozoni sa të mundeni ju, e tani…”, mësohet t'i jetë drejtuar Kupina asamblistit, përpara se t'ia mbyllte mikrofonin. Kjo deklaratë ka shkaktuar menjëherë reagime të shumta, ndërsa pak orë më vonë, kryesuesi ka përdorur llogarinë e tij në rrjetin social Facebook për të sqaruar pozicionin e tij rreth kësaj çështjeje. Kupina ka specifikuar se fjala e tij është thënë në kuadër të diskutimeve procedurale për organizimin dhe mbarëvajtjen e seancës, duke hedhur poshtë çdo pretendim se ka pasur për qëllim të nëpërkëmbë apo të cënojë bindjet dhe praktikat fetare të ndokujt. Ai ka vënë në pah se liria e ndërgjegjes dhe e besimit përbën një të drejtë fundamentale të sanksionuar me Kushtetutën e Republikës së Kosovës, e cila, sipas tij, gëzon respektin e tij të plotë. “Duke qenë edhe vetë njeri i besimit, e kuptoj rëndësinë shpirtërore dhe personale që praktikat fetare kanë për secilin individ. Respektimi i bindjeve fetare, për mua, nuk është vetëm detyrim kushtetues, por edhe një vlerë njerëzore dhe morale”, ka shkruar Kupina. Kreu i Kuvendit Komunal ka shprehur gjithashtu keqardhjen e tij nëse mënyra e formulimit gjatë seancës mund të ketë lënë përshtypjen e mungesës së konsideratës ndaj riteve fetare. “Megjithatë, jam i vetëdijshëm se komunikimi institucional kërkon kujdes dhe përgjegjësi të veçantë. Në këtë frymë, shpreh keqardhje nëse formulimi i përdorur ka krijuar përshtypjen e mungesës së respektit ndaj praktikave fetare”, ka deklaruar ai. Kupina ka potencuar se kjo deklaratë nuk duhet të shndërrohet në një arenë debatesh rreth fesë apo të shërbejë si nxitëse e polarizimit shoqëror, duke shtuar se nxjerrja e një fjalie nga konteksti nuk duhet të përdoret për të paragjykuar qëndrimin e tij ndaj besimit apo besimtarëve. “Besimi nuk ka qenë dhe nuk do të jetë objekt kundërshtimi apo përçarjeje nga ana ime. Ai është çështje e ndërgjegjes individuale, e cila meriton respekt, jo paragjykim”, ka shkruar ai në postimin e tij. Në përmbyllje, kryesuesi i Kuvendit Komunal të Prishtinës ka shprehur vlerësimin për rolin e mediave dhe qytetarëve në ushtrimin e kritikës dhe debatit publik, ndërsa ka siguruar se puna e tij institucionale do të vijojë të udhëhiqet nga paanshmëria, dinjiteti dhe respektimi i të drejtave dhe lirive të çdo individi. Ndryshe, Fehmi Kupina ishte futur në Kuvendin Komunal si asamblist i zgjedhur nga radhët e subjektit Lidhja e Prishtinës, ndërsa më vonë mori postin e kryesuesit pas arritjes së një marrëveshjeje koalicioni me Lidhjen Demokratike të Kosovës (LDK).