Pamje e rrallë: Cristiano Ronaldo e ndjek nga stoli fitoren e radhës të Portugalisë

Përfaqësuesja e Portugalisë ka vazhduar me suksese në Ligën e Kombeve, duke triumfuar ndaj Norvegjisë në kuadër të xhiros së dytë, një sfidë kjo që ka prodhuar një statistikë tejet të pazakontë për yllin e skuadrës, Cristiano Ronaldo. Sulmuesi 41-vjeçar nuk ka marrë fare minuta në këtë takim, duke e përjetuar të gjithë ndeshjen nga banka e rezervistëve. Ky duel shënon vetëm rastin e tetë në histori, nga gjithsej 234 paraqitje të tij me fanellën kuqezi, që ylli portugez e nis një ndeshje zyrtare nga stoli. Hera e fundit që Ronaldo e kishte nisur një sfidë zyrtare si zëvendësues daton në shtator të vitit 2024, në përballjen kundër Skocisë. Atëherë, ai ishte futur në fushë në fraksionin e dytë të lojës, duke shënuar edhe golin e triumfit me rezultatin 2:1. Megjithatë, detaji më domethënës ka të bëjë me periudhën se kur ylli portugez kishte qëndruar për 90 minuta të plota në stol gjatë një ndeshjeje zyrtare të kombëtares. Një gjë e tillë kishte ndodhur më 15 qershor 2008, në kuadër të Kampionatit Evropian. Në atë kohë, Portugalia ishte mposhtur 2:0 nga Zvicra, por kualifikimi në fazën tjetër kishte qenë tashmë i siguruar, ndërsa Ronaldo kishte mbetur jashtë fushës gjatë gjithë kohës. Nga ajo përballje e largët kanë kaluar plot 6679 ditë, duke e shndërruar ndeshjen ndaj Norvegjisë në një ngjarje jashtëzakonisht të rrallë për karrierën e tij të lavdishme me fanellën kombëtare. Nëse merren parasysh edhe ndeshjet miqësore, rasti i fundit kur Ronaldo kishte mbetur për 90 minuta i pandryshuar në stol daton në qershor të vitit 2024, gjatë ndeshjes kontrolluese mes Portugalisë dhe Kroacisë.