Investimim prej mbi 1 milion eurosh: KRU “Prishtina” modernizon flotën me 20 mjete të reja

Kompania Rajonale e Ujësjellësit “Prishtina” ka ndërmarrë një hap të rëndësishëm drejt modernizimit të infrastrukturës së saj, duke pasuruar autoparkun operativ me 20 automjete të reja. Sipas të dhënave zyrtare nga kjo ndërmarrje, vlera e këtij investimi kalon shifrën e 1 milion eurove. Ai përfshin gjithsej 10 vetura, shtatë kamioneta, dy ekskavatorë dhe një autobot, të cilat do t'i shërbejnë nevojave të përditshme të kompanisë. Përfaqësuesit e KRU “Prishtina” kanë theksuar se këto mjete të reja do të vihen menjëherë në dispozicion të ekipeve në terren. Ato do të shërbejnë për ndërhyrje më të shpejta dhe për trajtimin sa më efikas të ankesave dhe kërkesave të konsumatorëve. Nëpërmjet këtij zgjerimi të flotës, ndërmarrja synon të rrisë ndjeshëm efikasitetin operacional, duke ngritur kështu cilësinë dhe shpejtësinë e shërbimeve që u ofrohen qytetarëve.