Magjia e Messit nuk mjafton, Inter Miami pëson disfatë në sekondat e fundit nga Columbus Crew

Pavarësisht një tjetër paraqitjeje fantastike dhe një goli magjik nga Lionel Messi, Inter Miami nuk ka arritur të shmangë një humbje dramatike në udhëtim te Columbus Crew, në kuadër të kampionatit amerikan të futbollit, MLS. Takimi i zhvilluar të dielën u mbyll me rezultatin 2:1 në favor të vendasve, të siguruan tri pikët e plota përmes një goli të shënuar në minutat shtesë të përballjes. Ecuria e golave nisi në minutën e 28-të, kur vendasit zhbllokuan shifrat falë një penalltie të realizuar me sukses nga Josef Martinez. Përgjigjja e skuadrës nga Florida nuk vonoi. Vetëm pesë minuta më vonë, në minutën e 33-të, ylli argjentinas Lionel Messi tregoi edhe një herë klasin e tij duke shënuar një gol spektakolar nga goditja e dënimit për të barazuar shifrat 1:1. Për shtatëherë fituesin e Topit të Artë, ky ishte realizimi i tij i 21-të në sezonin e rregullt të MLS-së, duke konfirmuar edhe një herë formën e lartë. Oportuniteti për të përmbysur plotësisht rezultatin iu afrua sërish Messit në minutën e 62-të, por pas një depërtimi të bukur, portieri i vendasve, Patrick Schulte, bëri një ndërhyrje vendimtare duke e devijuar topin mbi traversë. Më pas, Inter Miami besoi se kishte gjetur golin e epërsisë kur David Ayala u shfaq i vetëm para portës dhe shënoi, mirëpo ky aksion u anulua nga gjyqtarët për pozicion jashtë loje. Në anën tjetër, Columbus gjithashtu pati mundësi të arta shënimi, ku Anass Zaroury goditi dy herë shtyllën, përfshirë një gjuajtje të jashtëzakonshme nga distanca që goditi pjesën e poshtme të traversës. Kur ndeshja po i afrohej fundit dhe gjithçka po aludonte drejt një barazimi, vendasit realizuan golin e triumfit në kohën shtesë. Pas një gjuajtjeje nga jashtë zonës të Brais Mendez, portieri i Inter Miamit, Rocco Rios Novo, nuk pati reagimin e duhur për të kontrolluar topin, duke i dhënë mundësi lojtarit të ardhur nga stolit, senegalezit Jamal Thiare, që të shënojë nga afër për 2:1. Kjo disfatë përbën një pengesë të madhe për ambiciet e Inter Miamit në krye të Konferencës Lindore. Ekipi i drejtuar nga Messi mbetet 14 pikë prapa kryesuesve të Nashville, ndërsa me 46 pikë ndan pozitën e dytë së bashku me New England Revolution. Në krahun tjetër, Columbus Crew vazhdon betejën e zjarrtë për një vend në “play-off”, duke u pozicionuar në vendin e 12-të me 29 pikë, vetëm katër më pak se zona që dërgon në fazën përfundimtare të kampionatit.