Tragjedi në Pejë: Humb jetën fëmija që u lëndua nga rrëzimi i një orendie

Një ngjarje e rëndë ka tronditur fshatin Pavlan të Pejës, ku një fëmijë ka ndërruar jetë si pasojë e lëndimeve të marra nga një aksident shtëpiak. Lajmin për këtë rast tragjik e ka konfirmuar togeri Sheremet Elezaj, zëdhënës i Policisë së Kosovës për rajonin e Pejës. Sipas njoftimit zyrtar, më 11 tetor, fëmija ishte dërguar fillimisht në Spitalin e Përgjithshëm të Pejës, ndërsa për shkak të gjendjes së rëndë shëndetësore, ishte transferuar për trajtim të mëtejshëm në Qendrën Klinike Universitare të Kosovës (QKUK). Sipas hetimeve paraprake, lëndimet fatale dyshohet se janë shkaktuar aksidentalisht nga rrëzimi i një orendie brenda hapësirave të shtëpisë ku banonte viktima. Përkundër përpjekjeve të stafit mjekësor, fëmija nuk ka arritur t’u mbijetojë plagëve dhe ka ndërruar jetë. Pas procedurave të nevojshme, prokurori i shtetit ka marrë vendim që trupi i pajetë i viktimës t'u dorëzohet familjarëve për kryerjen e ceremonisë së varrimit.