Ngjarje historike në UP: Studentja nga SHBA nis studimet master në Fakultetin Juridik

Fakulteti Juridik i Universitetit të Prishtinës ka shënuar një moment historik për institucionin, duke regjistruar për herë të parë një studente me shtetësi amerikane në programet e rregullta të studimit. Bëhet fjalë për Virginia Hugo-Vidal, e cila ka nisur rrugëtimin e saj akademik në programin master në gjuhën angleze, të titulluar “Të Drejtat e Njeriut, E Drejta Penale Ndërkombëtare dhe Drejtësia Tranzicionale”. Lajmi u bë publik përmes një njoftimi zyrtar nga ky fakultet, ku u konfirmua se me datën 7 tetor 2026, dekani Avni Puka priti në një takim zyrtar studenten Hugo-Vidal, duke i uruar mirëseardhje në ambientet e universitetit. Sipas të dhënave të publikuara, Hugo-Vidal vjen me një bagazh të pasur akademik, pasi më herët ka ndjekur studime në universitete të njohura ndërkombëtare. Ajo është studentja e parë amerikane që vendos të ndjekë studimet e plota në këtë institucion arsimor në Kosovë. Nga Fakulteti Juridik theksojnë se ky program master, i cili ofrohet në gjuhën angleze, ka arritur të tërheqë vazhdimisht studentë dhe pedagogë nga vende të ndryshme të botës që nga fillimi i tij në vitin akademik 2023/2024. Ky zhvillim dëshmon përkushtimin e vazhdueshëm të fakultetit për ndërkombëtarizimin e kurrikulave. Zgjerimi i bashkëpunimit me profesionistë dhe studentë të huaj mbetet një nga shtyllat kryesore të strategjisë së këtij institucioni për vitet e fundit.