Kurti pret në takim lamtumirës gjeneralmajorin Özkan Ulutaş: Falënderime për bashkëpunimin në krye të KFOR-it

Kryeministri i Republikës së Kosovës, Albin Kurti, ka pritur sot në një takim përcjellës komandantin e misionit të NATO-s në vend, KFOR, gjeneralmajorin Özkan Ulutaş. Gjatë këtij takimi lamtumirës, kreu i ekzekutivit i ka shprehur mirënjohjen e thellë për bashkëpunimin dhe koordinimin e ngushtë përgjatë dy mandateve të tij në krye të trupave paqeruajtëse. Në qendër të bisedimeve mes tyre kanë qenë ambiciet e Kosovës për anëtarësim në strukturat e NATO-s, skena politike aktuale dhe gjendja e sigurisë si brenda vendit ashtu edhe në nivel rajonal. Po ashtu, u diskutua mbi avancimin e kapaciteteve operacionale të Forcës së Sigurisë së Kosovës dhe Policisë së Kosovës, si dhe u shqyrtuan modalitetet për intensifikimin e partneritetit ndërmjet autoriteteve vendase dhe misionit të KFOR-it. Kurti ka vlerësuar se gjeneralmajor Ulutaş po e përmbyll misionin e tij në Kosovë duke lënë pas miqësi të sinqertë dhe kujtime të shkëlqyera. "Në dy mandatet e tij të komandës së KFOR-it, komunikimi me Gjeneralmajor Özkan Ulutaş ka qenë konstruktiv, ndërsa ai largohet nga vendi ynë si mik me të cilin do të ruajmë kujtime të mira", ka përcjellë mesazhin e tij shefi i qeverisë. "Në takimin lamtumirës sot, e falënderova për bashkëpunimin e bashkërendimin. Biseduam për rrugën drejt anëtarësimit në NATO, por edhe për zhvillimet aktuale politike, për situatën e sigurisë në vend dhe rajon, për ngritjen e kapaciteteve të Forcës së Sigurisë dhe të Policisë së Kosovës, për ndërveprimin e mirë të institucioneve të Republikës e KFOR-it, si dhe për mundësitë konkrete të zgjerimit dhe thellimit të tij", theksohet më tej në shkrimin e kryeministrit Kurti.