Incident i rëndë në Spanjë: Flakët kaplojnë trenin e shpejtësisë së lartë, evakuohen qindra udhëtarë

Një situatë emergjente është regjistruar mesditën e së hënës, më 12 tetor, në provincën e Zaragozës në Spanjë, pasi një tren i shpejtësisë së lartë AVE u përfshi nga flakët. Ky incident alarmoi autoritetet dhe detyroi evakuimin e menjëhershëm të 380 pasagjerëve në përputhje të plotë me protokollet e sigurisë. Sipas të dhënave zyrtare nga terreni, fatmirësisht të gjithë udhëtarët gëzojnë shëndet të plotë dhe deri më tani nuk është raportuar për asnjë person të lënduar apo dëmtime në njerëz. Ngjarja ndodhi rreth orës 16:05. Treni ishte nisur nga stacioni kryesor Atocha në Madrid me destinacion final qytetin e Figueres, por u detyrua të ndalonte urgjentisht pranë zonës së Ricla-s në Zaragozë, pasi flakët u diktuan në kabinën e pasme të mjetit hekurudhor. Ky zhvillim ka sjellë bllokimin e plotë të qarkullimit hekurudhor ndërmjet dy metropoleve kryesore, Madridit dhe Barcelonës. Kompania shtetërore e hekurudhave, Renfe, ka konfirmuar pezullimin e të gjitha nisjeve të parapara, ndërkohë që ende nuk ka një orar të caktuar se kur do të mund të rikthehet qarkullimi normal në këtë linjë. Për t'ju gjendur pranë udhëtarëve të prekur nga kjo ngjarje e papritur, operatori hekurudhor ka ofruar mundësinë e zëvendësimit të biletave ose rimbursimin e plotë të vlerës së tyre. Të gjitha shërbimet kompetente dhe grupet e emergjencës po monitorojnë situatën nga afër, teksa vijojnë verifikimet për të zbardhur shkaqet e rënies së zjarrit dhe për të përcaktuar kohëzgjatjen e pezullimit të qarkullimit.