A ka rritje të krimeve në Kosovë? Kriminologia analizon statistikat dhe efikasitetin e policisë

Puna e organeve të rendit dhe e institucioneve të sigurisë në Kosovë, me theks të veçantë Policia, gëzon një shkallë më të lartë efektiviteti krahasuar me shtetet e tjera të rajonit. Megjithatë, ekspertët vlerësojnë se mbetet ende punë për t'u bërë në fuqizimin e mekanizmave parandalues dhe ngritjen e bashkëpunimit ndërinstitucional. E ftuar për të diskutuar rreth dukurisë së vrasjeve, kriminologia Dita Makasqi ka bërë të ditur se shifrat e regjistruara gjatë gjashtëmujorit të parë të vitit 2026 nuk mund të shërbejnë si bazë për të konstatuar një ngritje të shkallës së vrasjeve në nivel vjetor. Statistikat e bëra publike tregojnë se nga janari deri në qershor të vitit 2026 janë shënuar 13 raste të vrasjeve, ndërkohë që gjatë gjithë vitit 2025 ky numër kapte shifrën e rreth 19 rasteve. Gjatë paraqitjes së saj në emisionin “Ditari” në Tëvë1, ajo ka vënë in-focus faktin se krahas angazhimit të sigurisë, lidhja dhe puna e përbashkët mes institucioneve dhe qytetarëve luajnë një rol kyç. “Nëse e krahasojmë me vendet e tjera të rajonit, mendoj se efektiviteti dhe puna e institucioneve, sidomos e Policisë, janë shumë më të mira dhe në nivel më të lartë sesa në vendet e tjera të Ballkanit. Megjithatë, mendoj se ende kemi nevojë për përmirësimin e mekanizmave të ndryshëm. Më e rëndësishmja është të ketë një koordinim multidisiplinar, i cili do të na ndihmonte të bëhemi një shoqëri shumë më e shëndoshë. Sipas të dhënave policore, gjatë periudhës janar–qershor 2026 janë regjistruar 13 vrasje, krahasuar me 19 raste gjatë gjithë vitit 2025. Meqenëse bëhet fjalë për periudha me kohëzgjatje të ndryshme, këto të dhëna nuk mjaftojnë për të nxjerrë përfundimin se ka pasur rritje vjetore të numrit të vrasjeve”, ka deklaruar Makasqi. Një shqetësim i veçantë, sipas saj, mbetet prania e krimeve të rënda që ndodhin në mjedisin familjar apo mes individëve që kanë njohhje paraprake mes vete. Për t'i bërë ballë kësaj dukurie, kriminologia kërkon qasje më të gjerë bashkëpunuese mes strukturave shtetërore dhe shoqërisë në funksion të garantimit të një mjedisi sa më të sigurt. “Fatkeqësisht, po kemi vrasje që ndodhin brenda familjeve dhe mes njerëzve që njihen me njëri-tjetrin, gjë që është tepër shqetësuese. Për këtë arsye, po e përsëris se është shumë i rëndësishëm bashkëpunimi ndërinstitucional dhe me shoqërinë, i cili mund të ndihmojë në përmirësimin e gjendjes së përgjithshme në vendin tonë”, ka përfunduar ajo.