Lidhje që kapërcejnë diplomacinë: Izraeli dhe Shqipëria forcojnë bashkëpunimin dypalësh

Kryediplomati izraelit, Gideon Sa’ar, ka bërë një vlerësim të lartë për raportet ndërmjet Izraelit dhe Shqipërisë, duke vënë inkursionin historik dhe parimet e larta morale në qendër të kësaj miqësie të veçantë. Gjatë konferencës së përbashkët për shtyp me ministrin për Evropën dhe Punët e Jashtme të Shqipërisë, Ferit Hoxha, ai ritheksoi se akti fisnik i shqiptarëve në mbrojtje të hebrenjve gjatë Luftës së Dytë Botërore mbetet një gur i çmuar në memorien e popullit izraelit. “Lidhja jonë shkon përtej kornizave tradicionale diplomatike. Ajo mbështetet mbi themelet e historisë. Gjatë periudhës së errët të Holokaustit, kur populli hebre përballej me përndjekje anembanë Evropës, familjet shqiptare hapën dyert e shtëpive të tyre për të shpëtuar jetë njerëzish. Kjo ishte shprehja e Besës, Kodi i tyre i nderit dhe zotimi i pashmangshëm për të gjendur pranë atyre që ndodheshin në vështirësi”, u shpreh ministri izraelit. Duke e cilësuar Shqipërinë si rastin e vetëm në gjithë kontinentin evropian që ndërmori një veprim të tillë humanitar, Sa’ar garantoi se ky gjest nuk do të harrohet kurrë nga Izraeli. Në fjalën e tij, kreu i diplomacisë izraelite vuri theksin edhe te solidariteti i treguar nga Tirana zyrtare pas ngjarjeve të 7 tetorit, duke e lidhur këtë qëndrim me të njëjtin standard të lartë moral që shqiptarët kanë shfaqur në momentet më sfiduese të historisë. “Dëshmojmë sot të njëjtën frymë morale në mbështetjen e patundur që Shqipëria i ka dhënë Izraelit pas masakrës së 7 tetorit”, deklaroi ai. Ndërkohë, bisedimet mes dy delegacioneve u fokusuan edhe te zgjerimi i fushave të bashkëpunimit. Pasi u kujtua marrëveshja dypalëshe në sektorin e shëndetësisë e nënshkruar një vit më parë, Sa’ar bëri me dije se partneriteti po avancon drejt një pakti më të gjerë ndërqeveritar, që do të sjellë mundësi të reja për afrimin e dy popujve. “Në këtë linjë, bashkëpunimi në fushën e sigurisë kibernetike u vlerësua si një domosdoshmëri përballë sfidave moderne. Kërcënimet në hapësirën digjitale prekin çdo shtet, ndaj një qasje e koordinuar do të rrisë aftësinë mbrojtëse për institucionet dhe qytetarët tanë”, shtoi ministri. Në përmbyllje të fjalës së tij, ministri izraelit solli në vëmendje edhe hov-in e madh të turizmit, duke treguar se fluksi i vizitorëve nga Izraeli drejt Shqipërisë ka njohur një rritje eksponenciale, nga rreth 7 mijë në rreth 100 mijë në vit, çka sipas tij dëshmon se qytetarët izraelitë ndihen plotësisht të sigurt dhe të mirëpritur në tokën shqiptare.