Paralajmërimi i ashpër i Bayernit për Real Madridin: Olise nuk është në shitje

Presidenti i Bayern Munichut, Herbert Hainer, ka thyer heshtjen rreth situatës së Michael Olise, duke i dërguar një mesazh të qartë Real Madridit dhe çdo klubi tjetër të interesuar për yllin francez. “Bayern Munich është një klub që nuk ka nevojë të shesë. Ne i marrim vendimet tona nga një pozitë force. Michael Olise ka kontratë me ne deri në vitin 2029,” deklaroi Hainer gjatë një paraqitjeje për “Bild TV”, duke shtuar: “Do të dëshiroja që ai të zgjasë kontratën e tij në një moment, dhe kam shpresë se do ta bëjë”. Spekulimet rreth të ardhmes së 24-vjeçarit janë intensifikuar gjatë muajve të fundit, veçanërisht gjatë Kupës së Botës në SHBA, Meksikë dhe Kanada. Mediat kanë raportuar se gjiganti spanjoll, Real Madridi, po konsideron një ofertë prej rreth 200 milionë eurosh për shërbimet e tij. Megjithatë, kreu i klubit gjerman mbetet i palëkundur: “Pavarësisht nëse Real Madridi apo dikush tjetër bën një lëvizje, ne dimë se si të mbrohemi mjaft mirë. Bayern Munich ka shumë për të ofruar”. Ndonëse nuk ka pasur ende bisedime konkrete për një marrëveshje të re – siç konfirmoi edhe drejtori sportiv Max Eberl pas barazimit 2-2 kundër FC Augsburg – Hainer shprehet tejet optimist për një akord përfundimtar me rrethin e lojtarit. Sipas tij, Olise ndihet “shumë komod” në Mynih. “Kur erdhi te ne, vetëm njohësit e mëdhenj të futbollit e dinin se kush ishte. Tani e gjithë bota e futbollit e njeh atë,” u shpreh 72-vjeçari, duke shtuar se është i bindur se francezi do ta fitojë Topin e Artë, mbase edhe këtë vit. Për ta bindur atë të qëndrojë afatgjatë, klubi bavarez thuajse ka përgatitur strategjinë e tij. Së fundmi, u raportua për mundësinë e përfshirjes së një bonusi të lidhur me Topin e Artë. Burimet e “Sky” shtojnë se Bayerni synon t’i ofrojë atij një kontratë të re deri në vitin 2032, me një pagë vjetore që mund të arrijë në 25 milionë euro, duke e vendosur atë në të njëjtin nivel me fituesit e lartë si Harry Kane dhe Jamal Musiala. Aktualisht, Olise përfiton rreth 14 milionë euro në vit. Ndonëse Real Madridi dikur synonte transferimin e tij, tani duket se po pajtohet me idenë se sulmuesi do të mbetet pjesë e kampionëve gjermanë. Nga ana tjetër, burime pranë lojtarit sugjerojnë se ai preferon të ketë një klauzolë largimi, një opsion që e kishte edhe te ish-skuadra e tij, Crystal Palace, para se Bayerni ta transferonte në vitin 2024 për 53 milionë euro. Aktualisht, marrëveshja e tij nuk përfshijnë një klauzolë të tillë. Klubi gjerman ndërkohë po i jep përparësi mbylljes së rinovimit të Harry Kane, kontrata e të cilit skadon në fund të këtij sezoni. Bisedimet me sulmuesin anglez kanë hyrë në fazën përfundimtare. “Jemi mjaft afër. Ndihem komod. Nuk do të kalojë edhe shumë kohë para se të ketë një njoftim,” u shpreh 33-vjeçari, duke i quajtur diskutimet mjaft produktive dhe të hapura.