Humbje surprizë ndaj Vllaznisë, Ilir Daja pranon dështimin: Nuk patëm sakrificën e duhur

Pavarësisht dominimit në zotërimin e topit, Dinamo nuk ka arritur të sigurojë asnjë pikë në sfidën ndaj Vllaznisë, duke u mposhtur me rezultatin minimal 0-1. Pas përfundimit të takimit, trajneri i skuadrës kryeqytetase, Ilir Daja, ka analizuar paraqitjen e skuadrës së tij para mediave. “Nuk arritëm të lexonim e të zgjidhnim siç duhet strategjinë e Vllaznisë, e cila u pozicionua mbrojtëse në gjysmëfushën e vet. Na dënuan veprimet e lojtarëve tanë me numrin 8. Megjithatë, për 5-6 ditë na pret përballja e radhës,” u shpreh fillimisht numri një i stafit teknik të Dinamos. Duke analizuar vështirësitë e ndeshjes, ai theksoi se përballë një kundërshtari të tërhequr kaq thellë, alternativat e golit ishin të pakta. “Kur gjen një kundërshtar që mbrohet në një të tretën e fushës, një nga mundësitë për të shënuar ishte përmes goditjeve. Vllaznia tregoi më shumë grintë se ne. Në një fushë me lagështirë, pavarësisht se terreni ishte i mirë, kërkohej një dozë më e lartë sakrifice, pasi goli realizohet pikërisht me sakrificë,” shtoi Daja. Më tej, trajneri u ndal te mangësitë taktike në fazën sulmuese, duke analizuar lëvizjet e repartit të avancuar dhe mesfushës. “Ne nuk bëmë aq sa duhej me sulmuesit dhe lojtarët e repartit të mesfushës për të prishur ekuilibrat e Vllaznisë. Malomo dhe Vila duhet të kishin qenë më pranë Berishës dhe Rubenit, për të sulmuar hapësirat në thellësi dhe për të shfrytëzuar numrat 8. Nëse do të provonim krahët me mbrojtësit anësorë, do të duhej një prani më e madhe lojtarësh në zonë, gjë që nuk e realizuam. Kur prapavija e tyre qëndronte e ulët, njëri nga sulmuesit duhet të merrte rolin e numrit 10 për të çorganizuar mbrojtjen kundërshtare,” përfundoi analizen e tij Ilir Daja, duke shprehur keqardhje për mungesën e grintës në këtë përballje.