Superliga e Femrave: Prishtina dhe Istogu triumfojnë bindshëm në ndeshjet e xhiros së tretë

Këtë të diel janë zhvilluar dy takimet e radhës në kuadër të xhiros së tretë të Superligës së Kosovës në hendboll për femra, ku skuadrat favorite kanë regjistruar fitore të rëndësishme në parket. Në duelin e zhvilluar në kryeqytet, skuadra e Prishtinës ka dominuar plotësisht ndaj Ulpianës, duke e mbyllur takimin me rezultat të thellë 43:13. Paraqitje fantastike për bardhekët bëri Kaltrina Paci, e cila shënoi 12 herë, e ndjekur nga Angelika Luberecka me nëntë gola. Ndërkohë, te skuadra e Ulpianës më e dalluara në aspektin sulmues ishte Vlerona Buja me pesë realizime. Në sfidën tjetër të luajtur në qytetin e Pejës, Istogu ka arkivuar një tjetër fitore mjaft të rëndësishme, duke mposhtur nikoqiret e Besës me shifrat 34:26. Fitorja e istogaseve u udhëhoq nga Eya Nasr, e cila ishte e pandalshme duke shënuar 13 gola, ndërsa kontribut të çmuar dha edhe Elsa Shala me shtatë finalizime të sakta. Te skuadra e Besës, e cila luftoi deri në fund, u dalluan Edona Radoniqi me shtatë gola dhe Dorentina Qufaj me pesë sosh, të cilat ishin më efikaset në radhët vendase. Pas këtyre ndeshjeve, renditja tabelare tregon se Istogu udhëheq me katër pikë nga dy ndeshje të zhvilluara, Prishtina dhe Besa numërojnë nga dy pikë secila, kurse Ulpiana mbetet ende në kërkim të pikëve të para këtij edicioni.