Kretë: 58-vjeçari shqiptar sulmohet me thikë në banesën e tij nga një adoleshent vendas

Një ngjarje e rëndë kriminale ka tronditur zonën e Agia Galinit në Kretë, Greqi, ku një shtetas shqiptar 58-vjeçar ka rënë viktimë e një sulmi me armë ftohtë, duke pësuar plagë të rënda. Autori i dyshuar i këtij akti dhune është një i mitur 17-vjeçar me kombësi greke. Ngjarja alarmoi autoritetet vendase mbrëmjen e kaluar dhe u regjistrua brenda shtëpisë së 58-vjeçarit, një emigrant që jeton dhe ushtron aktivitetin e tij profesional prej vitesh në atë rajon së bashku me familjen e tij. Sipas të dhënave paraprake nga burimet policore dhe ato vendase, situata ka degjeneruar në një konflikt fizik e verbal, gjatë të cilit i riu e ka goditur dy herë me thikë në zonën e barkut bashkëpatriotin tonë. Pas sulmit, agresori është larguar me shpejtësi nga vendi i ngjarjes për t'i shpëtuar ndjekjes, ndërkohë që arsyet dhe motivet që çuan në këtë përleshje mbeten ende të panjohura. Për shkak të plagëve të rënda dhe humbjes së madhe të gjakut, gjendja shëndetësore e të plagosurit vazhdon të mbetet mjaft kritike. Ai është transportuar fillimisht në Qendrën Shëndetësore të Moires për ndërhyrjen e parë mjekësore, dhe më pas është përcjellë me urgjencë përmes një autoambulance drejt Spitalit të Përgjithshëm Universitar të Heraklionit (PAGNI) për trajtim të specializuar.