Sindroma e "qafës së teknologjisë": Udhëzimet e ekspertëve për të parandaluar dhimbjet nga përdorimi i ekraneve

Me rifillimin e aktiviteteve shkollore dhe profesionale, koha e kaluar para ekraneve rritet ndjeshëm, duke sjerrë shpesh herë edhe qëndrime jonatyrale të trupit. Për të shmangur ngurtësimin dhe dhimbjet e qafës, Shoqata Italiane e Ortopedisë dhe Traumatologjisë ka ndarë disa udhëzime praktike. Nga korrespondenca e punës te detyrat në platformat digjitale, mesazhet në rrjetet sociale, videolojërat dhe argëtimi, pajisjet si smartfonët, tabletët dhe kompjuterët janë bërë pjesë e pandashme e përditshmërisë sonë që në moshë të hershme, duke zënë një pjesë të madhe të ditës sonë. Megjithëse teknologjia na lehtëson jetën në shumë drejtime, ajo mbart edhe rreziqe për shëndetin fizik, kryesisht të lidhura me pozicionet e gabuara që mbajmë për periudha të gjata kohore. Një nga problemet më të përhapura është e ashtuquajtura "tech neck" ose "text neck", një çrregullim muskulor dhe skeletor që shkaktohet nga mbajtja e qafës e përkulur përpara gjatë përdorimit të vazhdueshëm të pajisjeve celulare. “Kur koka anohet përpara, nga pikëpamja biomekanike ndryshon mënyra se si shpërndahet ngarkesa mbi strukturat e qafës”, shpjegon Alberto Di Martino, ekspert i Shoqatës Italiane e Ortopedisë dhe Traumatologjisë dhe profesor në Universitetin e Bolonjës dhe Institutin Ortopedik Rizzoli. “Qendra e gravitetit të kokës zhvendoset përpara dhe muskujt, si edhe strukturat e pasme të qafës, duhet të punojnë më shumë për ta mbajtur atë në pozicion”, shton ai. Mbajtja e këtij pozicioni për më shumë se tri ose katër orë, e kombinuar me mungesën e aktivitetit fizik dhe një stil jetese sedentar, mund të çojë në shfaqjen e dhimbjeve të qafës, ngurtësimit, tensionit në shpatulla, dhimbjeve të kokës dhe lodhjes muskulare. Tek fëmijët dhe adoleshentët, të cilët janë ende në proces zhvillimi, ky fenomen mund të shkaktojë edhe ndryshime në posturë, siç janë shpatullat e lëvizura para dhe theksimi i lakimit të shtyllës kurrizore në pjesën e sipërme. Pavarësisht kësaj, specialistët theksojnë se pajisjet digjitale nuk duhet të demonizohen. Sipas Pietro Simone Randelli, president i Shoqërisë Italiane të Ortopedisë dhe Traumatologjisë dhe profesor në Universitetin e Milanos, çelësi qëndron te përdorimi i ndërgjegjshëm i tyre, veçanërisht gjatë periudhave të rikthimit në rutinën e punës dhe studimit kur orët para ekraneve shtohen. Për të mbrojtur shëndetin tuaj, ekspertët sugjerojnë tre hapa kryesorë: së pari, përkulja e qafës duhet të mbahet në nivele sa më të ulëta, duke shmangur një anim të kokës mbi 30 gradë për kohë të gjatë. Së dyti, organizimi i hapësirës së punës është thelbësor; monitori, tableti apo telefoni duhet të vendosen në lartësinë e syve për të shmangur uljen e kokës. Së treti, bërja e pushimeve të rregullta gjatë orëve të gjata para ekranit është e domosdoshme për të shmangur mbingarkesën fizike.