Tragjedia e elektriçistit në Kamëz, Salianji takon familjen: Dyshime për mbulim të ngjarjes dhe tentativa për heshtje me para

Ervin Salianji ka zhvilluar një vizitë në fshatin Laknas, në familjen e Lutfi Elezajt, elektriçistit që humbi jetën gjatë ushtrimit të detyrës. Gjatë këtij takimi, ai ka kërkuar hetim të plotë, të pavarur dhe të paanshëm për të hedhur dritë mbi rrethanat e vërteta të ngjarjes tragjike, duke ngritur pikëpyetje të forta mbi versionin zyrtar se bëhet fjalë për një infarkt miokardi. Sipas dëshmive të mbledhura gjatë vizitës, bashkëshortja dhe familjarët e të ndjerit janë shprehur të tronditur nga mënyra se po trajtohet çështja nga institucionet. Ata pretendojnë se janë përballur me dyer të mbyllura dhe me përpjekje sistematike për t'u mbyllur gojën përmes ofertave financiare dhe premtimeve për punësim, në vend që t'u jepen përgjigje transparente për humbjen e njeriut të tyre që i fali 40 vite punë këtijprofesioni. Salianji e ka cilësuar këtë qasje si një metodë të papranueshme për të blerë heshtjen dhe për të mbyllur një dosje jetësore me një firmë burokratike. Ai theksoi se dhimbja e bashkëshortes dhe djemve të Lutfi Elezajt nuk mund të tregtohet dhe se askush nuk ka të drejtë të pengojë drejtësinë apo të fshehë të vërtetën e një vdekjeje që mbetet ende e mbështjellë me dyshime serioze. Në fund të reagimit të tij publik, Salianji ka garantuar se do të jetë në mbështetje të kësaj familjeje të braktisur nga institucionet, duke kërkuar llogaridhënie të plotë dhe zbardhjen e çdo përgjegjësie ligjore që lidhet me këtë ngjarje të rëndë.