Kthehet moti i paqëndrueshëm në vend: Nga nesër priten reshje shiu, vranësira dhe erë e fortë

Republika e Maqedonisë së Veriut do të përfshihet nga një valë e motit të paqëndrueshëm, si pasojë e depërtimit të masave ajrore të lagështa, të shoqëruara me vranësira të ndryshueshme dhe reshje të kohëpaskohshme shiu. Sipas parashikimeve të Drejtorisë për Punë Hidrometeorologjike (DPHM), duke filluar nga dita e nesërme e deri në prag të fundjavës së ardhshme, vendi ynë do të ndikohet nga erëra mesatare deri të fuqishme nga drejtimi i veriperëndimit, të cilat në momente të caktuara pritet të jenë mjaft të fuqishme. Gjatë ditës së nesërme, kushtet atmosferike do të karakterizohen me vranësira dhe reshje lokale shiu. Termometrat në orët e mëngjesit do të shënojnë vlera minimale nga 8 deri në 16 gradë Celsius, ndërsa temperaturat maksimale gjatë ditës do të lëvizin ndërmjet 14 dhe 22 gradë Celsius. Edhe në kryeqytet, në Shkup, situata meteorologjike do të jetë e ngjashme. Mëngjesi do të nisë me një temperaturë rreth 14 gradë Celsius, kurse gjatë ditës termometri pritet të ngjitet deri në 20 gradë Celsius.