Dukagjini frenon Prishtinën, bardhekaltërit ndalen pas gjashtë fitoresh rresht

Prishtina ka regjistruar ndalesën e parë në këtë edicion të Superligës së Kosovës në futboll, duke barazuar pa gola (0:0) përballë Dukagjinit. Ndeshja interesante mes kryeqytetasve dhe skuadrës klinase u zhvillua mbrëmjen e sotme në Kampin Nacional në Hajvali, nën ndriçimin e reflektorëve, ku të dyja palët shfaqën paraqitje solide në fushën e blertë. Edhe pse u angazhuan maksimalisht deri në sekondat e fundit për të rrëmbyer tri pikët e radhës, vendasit nuk ia dolën dot të çajnë mbrojtjen e mirëorganizuar të mysafirëve. Me këtë barazim, Dukagjini shndërrohet në ekipin e parë që i heq pikë Prishtinës këtë sezon, duke i dhënë fund serisë prej gjashtë sukseseve radhazi të skuadrës nga kryeqyteti. Pas mbylljes së javës së tetë, Prishtina mbetet në krye të renditjes tabelare me 19 pikë – aq sa ka edhe Malisheva – ndërkohë që Dukagjini pozicionohet në shkallën e tretë të podiumit me 13 pikë të grumbulluara. Vlen të theksohet se Prishtina ka ende një ndeshje më pak për të zhvilluar.