Partneriteti për sigurinë, Kingji pritje speciale për komandantin e KFOR-it me rastin e mbylljes së mandatit

Shqipëria dhe Forcat e Armatosura riafirmojnë përkushtimin e tyre të palëkundur për të mbështetur misionin e KFOR-it në Kosovë, duke dhënë një kontribut të çmuar në ruajtjen e paqes, sigurisë dhe stabilitetit afatgjatë në të gjithë rajonin. Në kuadër të përfundimit të misionit të tij në krye të trupave të NATO-s në Kosovë, Shefi i Shtabit të Përgjithshëm të Forcave të Armatosura të Shqipërisë, Arben Kingji, ka zhvilluar një takim zyrtar me komandantin e KFOR-it, gjeneralmajor Özkan Ulutaş. Gjatë këtij takimi u vlerësua lart puna, udhëheqja dhe roli kyç i gjeneralmajor Ulutaş në kryerjen me sukses të detyrave dhe përmbushjen e misionit paqeruajtës të Aleancës Euroatlantike në territorin e Kosovës. Kreu i ushtrisë shqiptare, Arben Kingji, bëri të ditur se në fokus të bisedës kanë qenë zhvillimet aktuale të sigurisë, hapat e mëtejshëm të KFOR-it për garantimin e qetësisë, si dhe domosdoshmëria e bashkëpunimit për mbrojtjen e stabilitetit rajonal. "U ritheksua gjithashtu angazhimi i Shqipërisë dhe i Forcave të Armatosura për përmbushjen e detyrimeve në kuadër të këtij operacioni të rëndësishëm të NATO-s," u shpreh Kingji pas takimit.