Ndeshje dramatike në “Karagaçi”, Besa Famgas mposht me sukses Kastriotin

Përballjet mes Besa Famgas dhe Kastriotit kanë dhuruar edhe një herë tjetër spektakël, rivalitet të fortë dhe emocione deri në sekondat e fundit të takimit. Të dielën në mbrëmje, në palestrën sportive “Karagaçi” në qytetin e Pejës, skuadra vendase e Besa Famgas triumfoi ndaj rivalëve nga Ferizaj, Kastriotit, me një rezultat të ngushtë 29:28. Klubi nga Peja e nisi sfidën në mënyrë të shkëlqyer, duke krijuar një epërsi të sigurt që në fraksionin e parë të lojës, i cili u mbyll me shifrat 16:12 në favor të tyre. Megjithatë, ferizajasit treguan karakter të fortë dhe nuk u dorëzuan, duke ngushtuar diferencën në 27:25 në minutën e 55-të, e më pas në 28:27 në minutën e 57-të. Pejanët reaguan përmes Oliver Rabek, i cili shënoi për rezultatin 29:27 në minutën e 59-të. Edhe pse në sekondat e fundit Eray Karakoç realizoi për Kastriotin duke e çuar rezultatin në 29:28, Besa menaxhoi me sukses aksionin e fundit të lojës, duke siguruar pikët e plota. Në aspektin individual, Deniz Terziqi ishte kryegolashënuesi i ndeshjes për Besa Famgas me tetë gola të realizuar, i ndjekur nga Yassine Henahen me shtatë, si dhe Jon Muqolli e Oliver Rabek që kontribuan me nga katër gola secili. Te skuadra e Kastriotit, më i dalluari në fushë u tregua Vuk Lakiçeviq me shtatë finalizime të suksesshme, ndërsa Eray Karakoç dhe Festim Mustafa shtuan nga gjashtë gola secili. Kjo përballje mbylli siparin e xhiros së tretë në Superligën e Kosovës në hendboll. Me këtë fitore, e cila është e a treta me radhë, Besa Famgas ngjitet në krye të tabelës me gjashtë pikë të grumbulluara, ndërkohë që Kastrioti regjistron një fitore dhe një humbje në bilancin e deritanishëm.