Rrëfimi prekës i Blerina Matrakut në lot: U përdora, por nuk kam turpëruar kurrë familjen time

Këngëtarja Blerina Matraku e ka mbyllur me lot në sy intervistën e saj në emisionin “Goca dhe Gra”, teksa është rikthyer te ngjarja e bujshme e publikimit të videove të saj intime me kompozitorin Adi Hila. E pyetur për marrëdhënien dhe reagimin e babait të saj pas skandalit, artistja nuk i ka përmbajtur dot emocionet, duke pranuar se po kalon një ngarkesë të rëndë psikologjike që e ka lënë të rraskapitur. Ajo ka treguar se i janë dashur katër ditë e netë të plota izolimi vetëm për të mbledhur forcat e para pas tronditjes së madhe që pësoi kur mësoi se pamjet e saj private kishin dalë në publik. “Po ç’mund të të them unë për një baba që, ku ishe këto ditë, hajde çohemi pimë kafe. Ç’mund të them unë për një baba që nuk do t’i vinte urrenjtësi vajzës së vet, për një nënë që thotë do të kalojë edhe kjo”, u shpreh ajo e përlotur, duke shtuar se pesha e kësaj situate është tejet e rëndë për dikë që është munduar të jetojë gjithmonë me ndershmëri. Matraku ka theksuar se është bërë viktimë e një keqpërdorimi dhe se lotët e saj nuk shuhen prej ditësh, ndërsa u bëri thirrje publikut dhe mediave që të ndalojnë së qeni pjesë e këtij makthi. Duke iu drejtuar kritikëve dhe atyre që e gjykuan ashpër, ajo kujtoi se gabimet janë njerëzore dhe kërkoi mirëkuptim e falje, pasi sipas saj, ajo është kryqëzuar dhe është ftuar padrejtësisht në gjykatën e opinionit publik, duke e bërë të ndjejë turp për dikë që ka pasur gjithmonë vlera të larta morale. Këngëtarja theksoi se viktimat shpesh mbeten pa zë nga shoku dhe se ajo nuk dëshiron të akuzojë paraprakisht askënd, por pret që drejtësia të thotë fjalën e fundit dhe autori i shpërndarjes së videove të marrë dënimin e merituar. “Unë babin do ta marr kudo që të shkoj, nuk e kam turpëruar, nuk do ta turpëroj familjen time, më kanë përdorur. Nuk po them emra, nuk mund të jetë ai, mund të jetë dhe ai, nuk di të them. Por unë jam përdorur dhe sot gjej kurajën të them që jam një njeri i dhunuar emocionalisht, jam e lodhur. Nuk mundem më”, përfundoi ajo rrëfimin e saj shkatërrues.