Procedura të reja për letërnjoftimet: Qeveria miraton rregulloren për shpërndarjen dhe asgjësimin e kartave të identitetit

Këshilli i Ministrave ka ndërmarrë një sërë ndryshimesh thelbësore në kuadrin rregullator për dokumentet e identitetit të shtetasve shqiptarë, duke përcaktuar zyrtarisht mënyrën e shpërndarjes së letërnjoftimeve elektronike. Paketa e re ligjore vjen me propozim të Ministrit të Punëve të Brendshme, mbështetur në Kushtetutë dhe në ligjin “Për letërnjoftimin elektronik dhe digjital të shtetasve shqiptarë”. Kështu, plotësohet vendimi i mëparshëm i Këshillit të Ministrave nr. 253, datë 27.4.2007, duke zgjeruar fushën e tij të veprimit me shtimin e përcaktimeve për modalitetet e shpërndarjes. Në dokument shtohet aneksi nr. 3 që rregullon hap pas hapi shpërndarjen e letërnjoftimeve, ndërsa pika 2/2 ofron një qartësim të terminologjisë zyrtare. Autoritet përgjegjës konsiderohet shoqëria aksionare e ngarkuar për prodhimin dhe shpërndarjen e dokumenteve biometrike, ku shpërndarja përkufizohet si dorëzimi i sigurt i dokumentit te mbajtësi pas përfundimit të aplikimit dhe personalizimit. Sipas rregullores së re, zyrat e aplikimit do të funksionojnë brenda vendit në bashkëpunim me njësitë e vetëqeverisjes vendore, ndërsa jashtë territorit të Shqipërisë në bashkëpunim me ministrinë përgjegjëse për punët e jashtme. Në parim, letërnjoftimi tërhiqet në të njëjtën zyrë ku është bërë aplikimi. Megjithatë, për lehtësinë e qytetarëve, autoriteti përgjegjës mund të caktojë edhe mjedise alternative, gjithmonë duke garantuar standardet e duhura të sigurisë. Dokumenti duhet të merret personalisht nga vetë aplikuesi sipas protokolleve teknike. Janë parashikuar gjithashtu procedura të posaçme për zyrat brenda dhe jashtë vendit, për mjedise të tjera të miratuara, si dhe për rastet kur qytetari ka pamundësi fizike ose objektive për të paraqitur në zyrat e caktuara. Sa i përket kartave që mbeten pa u tërhequr, vendimi parashikon se ato do të ruhen nga strukturat e autoritetit për të paktën 12 muaj nga data e prodhimit, por jo më vonë se muaji dhjetor i vitit pasardhës. Pas këtij afati, dokumentet e pautorizuara do t'enënshtrohen procedurës së asgjësimit sipas ligjit në fuqi. Për aplikimet e kryera në diasporë, misionet diplomatike dhe postet konsullore do t'i kthejnë dokumentet e patërhequra brenda 12 muajve përmes rrugës postare pranë Ministrisë për Evropën dhe Punët e Jashtme, e cila më pas do t'ia dorëzojë autoritetit përgjegjës për asgjësim. Zbatimi i këtyre ndryshimeve i është besuar Ministrisë së Punëve të Brendshme dhe shoqërisë aksionare të autorizuar. Akti normativ hyn në fuqi menjëherë pas botimit zyrtar në Fletoren Zyrtare.