Nis derbi i kryeqytetit: Zbulohen formacionet zyrtare të superpërballjes Partizani – Tirana

Sonte në mbrëmje do të zhvillohet derbi i parë sezonal i Abissnet Superiores mes Partizanit dhe Tiranës, një duel që premton emocione të forta pavarësisht ecurisë jo të dëshiruar të dy ekipeve në këtë fillim kampionati. Bardheblutë e Tiranës paraqiten në këtë takim pas një nisjeje me 1 fitore, dy barazime dhe dy humbje, duke mbajtur vendin e gjashtë me 5 pikë në klasifikim. Nga ana tjetër, “demat e kuq” të Partizanit regjistrojnë 1 fitore, 1 barazim dhe tri humbje, statistika që i pozicionojnë në vendin e tetë me 4 pikë. Sa i përket historikut të dhjetë përballjeve të fundit, Partizani ka triumfuar katër herë, Tirana tri herë, ndërsa tri sfida të tjera janë mbyllur në barazim. Pavarësisht formës aktuale të dy skuadrave, entuziazmi i tifozëve mbetet i lartë, ku rreth 8000 shikues pritet të ndjekin nga afër spektaklin në stadiumin “Air Albania”. Për mbarëvajtjen e këtij takimi delikat, delegimi i gjyqtarëve i është besuar kryesorit Juxhin Xhaja, i ndihmuar nga anësorët Arbër Zalla dhe Rejdi Avdo, ndërsa arbitër i katërt është caktuar Enis Dishani. Në dhomën e VAR-it do të operojnë Florjan Lata dhe Eldorjan Hamiti. Ndërkohë, trajnerët e të dyja ekipeve, Florin Bratu te Partizani dhe Dean Klafuriç te Tirana, kanë zyrtarizuar zgjedhjet e tyre për titullarët që do të zbresin në fushë nga minuta e parë. PARTIZANI XI: Qirko; Atanaskoski, Janjeva, Aliu, Ismaili, Skuka, Himallari, Human, Marku, Ogunleye, Mija TIRANA XI: Bekaj; Ndong, Krymi, Myslovic, Daci, Vitija, Xhixha, Qerimaj, Hazrollaj, Ilievski, Stani