Tragjedi në Greqi: Ndërron jetë shqiptari 50-vjeçar pas plagëve të rënda nga shpërthimi në fabrikë

Bilanci i ngjarjes tragjike në komplekse industriale të “Motor Oil” në Agioi Theodoroi të Greqisë është rënduar edhe më shumë, pasi pak para orës 13:00 të ditës së diel, viktima e dytë e plagosur rëndë ka ndërruar jetë në spital. 50-vjeçari Dorian Hysa nuk ka mundur t'u mbijetojë plagëve të marra, pavarësisht përpjekjeve titanike të stafit mjekësor. Burri shqiptar ishte shtruar i intubuar në gjendje kritike për jetën në Spitalin e Përgjithshëm “Thriasio” në Elefsina, pasi kishte pësuar dëmtime të rënda në kokë gjatë aksidentit në punë. Me ndarjen e tij nga jeta, numri i viktimave nga ky incident i rëndë ka shkuar në dy. Kujtojmë se një nga viktimat e para të kësaj tragjedie ishte edhe 43-vjeçari Robert Cakaj, gjithashtu me origjinë shqiptare, i cili humbi jetën më 9 tetor në Njësinë e Djegieve të po këtij spitali, pasi pësoi djegie dhe lëndime të shumta gjatë kryerjes së detyrës. Ndërkohë, autoritetet e rendit dhe policia greke kanë nisur një hetim të thelluar për të zbardhur shkaqet dhe për të verifikuar mangësitë e mundshme në masat e sigurisë gjatë punimeve të mirëmbajtjes. Si pjesë e hetimeve paraprake, policia ka proceduar me arrestimin e tre drejtuesve të kompanisë “Motor Oil”, të cilët kishin përgjegjësi direkte në mbikëqyrjen e këtij projekti.