Bayern Munichu vihet pas Jules Kounde, mbrojtësi i Barcelonës kërkohet edhe në Premier League

Gjiganti i Bundesligës, Bayern Munich, thuhet se po e vlerëson seriozisht mundësinë e transferimit të mbrojtësit të Barcelonës, Jules Kounde, i cili gjatë këtij sezoni nuk ka arritur të sigurojë minutat e dëshiruara nën drejtimin e trajnerit Hansi Flick. Sipas raportimeve të mediave gjermane, bavarezët nuk janë të vetmit që po e monitorojnë nga afër situatën e 27-vjeçarit francez. Për shërbimet e tij kanë shprehur interesim edhe disa prej skuadrave më të mëdha të Premier League-s, ku përfshihen Arsenal, Chelsea, Liverpool, Manchester United dhe Manchester City. Gjatë këtij edicioni, Kounde ka nisur si titullar në vetëm dy nga pesë paraqitjet e tij, ndërsa në tri sfidat e fundit të katalanasve në La Liga ka qenë i detyruar të mbetet në bankën rezervë. Megjithëse mbrojtësi e kupton qasjen dhe vendimet e teknikut Flick, mungesa e vazhdueshmërisë në fushë mund ta shtyjë atë që të mendojë largimin nga “Camp Nou”, nëse pozita e tij nuk përmirësohet në muajt në vijim. Prapëseprapë, një operacion i tillë tregu nuk pritet të jetë i thjeshtë, duke pasur parasysh se futbollisti ka një marrëveshje valide me Barcelonën e cila skadon në vitin 2030. Kujtojmë se Kounde u transferua te Barcelona në vitin 2022 nga radhët e Sevillas për një shifër prej 50 milionë eurosh. Prej atij momenti, ai ka numëruar 193 paraqitje në të gjitha kompeticionet zyrtare, duke kontribuar me 10 gola dhe 22 asistime. Tashmë mbetet për t'u parë nëse Bayerni do të ndërmarrë hapa konkretë për ta sjellë në Gjermani, si dhe nëse drejtuesit e klubit katalanas do të jenë të hapur për të diskutuar shitjen e tij.