Dhuna ndaj dy të rinjve në Saraj, MPB e Maqedonisë së Veriut pezullon nga detyra gjashtë policë

Departamenti i Kontrollit të Brendshëm pranë Ministrisë së Punëve të Brendshme të Maqedonisë së Veriut ka vërtetuar tejkalim flagrant të kompetencave dhe përdorim të dhunës së pajustifikuar fizike ndaj dy të rinjve nga Saraj i Shkupit, ngjarje kjo e regjistruar pak ditë më parë në kryeqytet. Nëpërmjet një njoftimi zyrtar, dikasteri i punëve të brendshme ka bërë të ditur se për këtë rast të shpërdorimit të forcës nga ana e punonjësve të policisë, ndaj gjashtë prej tyre ka nisur procedura disiplinore për shkelje të rënda të rregullave në punë, shoqëruar kjo me masën e menjëhershme të largimit nga detyra, respektivisht suspendimin. Sipas hetimeve të kryera, bazuar te pamjet filmike të siguruara nga vendi i ngjarjes dhe dëshmitë e mbledhura, autoritetet kompetente kanë konfirmuar një sërë shkeljesh gjatë ndërhyrjes së efektivëve. Për këtë arsye, Departamenti i Kontrollit të Brendshëm, Hetimeve Kriminalistike dhe Standardeve Profesionale ka ndërmarrë hapat ligjorë për shkarkimin e përkohshëm të gjashtë zyrtarëve policorë. Ndërkohë, lidhur me kallëzimet për vepra penale të dorëzuara në organet e rendit dhe në Kontrollin e Brendshëm, prokuroritë përkatëse kanë lëshuar urdhërat e nevojshme për ekspertiza të mëtejshme. Pasi i gjithë materiali provues të jetë dokumentuar plotësisht, do të dorëzohen edhe kallëzimet përkatëse penale.