Kriza thellohet në “Old Trafford”: Manchester United regjistron nisjen më të dobët prej vitit 1986 pas barazimit me Tottenhamin

Manchester United ka vazhduar me paraqitje zhgënjyese në elitën e futbollit anglez, pasi të shtunën barazoi me rezultatin 1:1 ndaj Tottenhamit në stadiumin “Old Trafford”. Ky rezultat e ka zhytur skuadrën në startin e saj më të dobët kampionarak që nga edicioni 1986/87. Formacioni i drejtuar nga Michael Carrick ka mbledhur vetëm gjashtë pikë nga gjashtë duelet e para, duke regjistruar vetëm një fitore, tri barazime dhe dy humbje. Edhe pse londinezët pozicionoheshin në fund të renditjes tabelore para kësaj sfide dhe ende nuk e kishin shijuar shijen e fitores në kampionat, “Djajtë e Kuq” dështuan të shfrytëzojnë madje edhe epërsinë numerike në fushë. Fraksioni i parë i lojës në “Old Trafford” ishte tejet zhgënjyes për vendasit, të cilët patën pengesa të mëdha në ndërtimin e rasteve shënuese, ndërkohë që Tottenhami u tregua dukshëm më këmbëngulës, duke humbur disa mundësi të arta për të kaluar në epërsi. Impakti i vendasve u ndje në minutën e 73-të, kur Bryan Mbeumo zhbllokoi shifrat pas një pasimi vendimtar nga Matheus Cunha. Vetëm pesë minuta më vonë, situata u lehtësua në letër për Unitedin pasi Rodrigo Bentancur u ndëshkua me karton të kuq pas një dyluftimi me Luke Shaw, duke lënë Tottenhamin me dhjetë futbollistë. Megjithatë, në vend që ta menaxhonin avantazhin dhe ta mbyllnin takimin, vendasit lejuan kundërshtarin të rikthehej në lojë. Në minutën e 90+2-të, Dominic Solanke shfrytëzoi hutimin në mbrojtje dhe shënoi golin e barazimit, duke i dhuruar një pikë të çmuar Tottenhamit dhe duke shkaktuar zemërim të madh te tifozët vendas. Statistikat tregojnë se United ka dështuar të triumfojë në tri ndeshjet e fundit kampionatit ku kundërshtari është ndëshkuar me karton të kuq, duke e bërë edhe më shqetësues faktin se skuadra nuk po di të ruajë kontrollin kur ka epërsi. Strategu Michael Carrick nuk e fshyu aspak zhgënjimin në konferencën pas ndeshjes, duke pranuar hapur se krejt çfarë kanë grumbulluar deri më tani është e pamjaftueshme. “Jam shumë i zhgënjyer me rezultatin. Ishte një paraqitje e përzier. Nuk jam i kënaqur me numrin e pikëve që kemi deri tani”, u shpreh Carrick. Ai shtoi se ekipi ka nevojë urgjente për kthesë, duke pranuar se reagimi i ashpër i publikut në tribuna e ka lënë pa fjalë: “Kur gjërat nuk shkojnë sipas planit, e kuptoj reagimin. Natyrisht, dhemb shumë”. Në krahun tjetër, trajneri i Tottenhamit, Roberto De Zerbi, ka lëvduar qëndresën e djemve të tij, veçanërisht pas largimit të Bentancurit nga fusha. “Jam shumë i lumtur, sepse pashë shpirtin dhe karakterin e duhur”, tha De Zerbi. Edhe pse mbeten pa fitore pas gjashtë javësh me vetëm tri pikë në konto, ky barazim në “Old Trafford” shërben si një impuls i fortë moral për teknikun italian. Për Manchester Unitedin, presioni mbi Michael Carrick pritet të rritet ndjeshëm. Me vetëm një fitore nga gjashtë sfida dhe pikë të lëshuara ndaj një kundërshtari me dhjetë lojtarë, skuadra duhet të reagojë menjëherë për të shmangur thellimin e krizës qysh në hapat e parë të sezonit.