Superliga e Basketbollit: Golden Eagle Ylli pret Pejën, Rahoveci kërkon triumfin e parë ndaj Prishtinës

Këtë të diel, sytë e adhuruesve të basketbollit do të jenë të drejtuar nga palestrat e vendit, at ku do të zhvillohen dy super-përballje mjaft interesante në kuadër të elitës së këtij sporti. Në orën 17:00, në palestrën “13 Qershori” në Suharekë, skuadra e Golden Eagle Yllit do të jetë nikoqire e Pejës. Vendasit vijnë në këtë duel me moral të lartë pas triumfit të parë sezonal të arritur javën e kaluar kundër Sigal Prishtinës, kurse skuadra pejane synon këndpamjen e re dhe rikthimin te rezultatet pozitive, pasi në ndeshjen e fundit u mposht nga Vëllaznimi. Duke parë ambiciet e larta të të dyja klubeve për këtë edicion, ky takim premton rivalitet të madh në parket. Ndërkohë, xhiroja e katërt do të mbyllet me sfidën mes Rahoveci 029 dhe Sigal Prishtinës, e cila do të luhet të dielën duke filluar nga ora 19:30 në palestrën “Mizahir Isma”. Rahovecasit mbeten skuadra e vetme në kampionat që ende nuk e kanë shijuar shijen e fitores, ndërsa kjo do të jetë ndeshja e tyre e tretë para tifozëve vendës brenda katër xhirove të para të këtij sezoni. Të ashtuquajturit “Vreshtarë” janë të vendosur ta shfrytëzojnë mbështetjen e publikut vendas për të regjistruar suksesin e parë, kurse prishtinasit udhëtojnë drejt qytetit të Rahovecit me synimin e qartë për t'u këndellur dhe për të marrë pikët e plota.