Barcelona pa yllin brazilian, Hansi Flick konfirmon mungesën e tij për dy ndeshjet e radhës

Trajneri i Barcelonës, Hansi Flick, ka konfirmuar zyrtarisht mungesën e njërit prej lojtarëve kyç të skuadrës, i cili po kalon në një formë të shkëlqyer këtë edicion, me 12 gola dhe tre asiste të regjistruara në vetëm shtatë paraqitje në La Ligë. Bëhet fjalë për sulmuesin Raphinha, i cili pësoi një edemë muskulore në kofshën e djathtë pasi ndjeu dhimbje gjatë ndeshjes miqësore mes Brazilit dhe Australisë. Për shkak të këtij shqetësimi, ai është i detyruar të qëndrojë jashtë fushave për të shmangur çdo rrezik të përkeqësimit të gjendjes fizike. Gjatë konferencës për shtyp, strategu gjerman dha detaje rreth situatës së futbollistit: “Testet zbuluan diçka, nuk është një dëmtim serioz, por duhet të jemi të kujdesshëm sepse ai pati tri ndalesa të ngjashme vitin e kaluar dhe duhet të kujdesemi për të”. Si pasojë e kësaj mase paraprake, Raphinha nuk do të jetë i disponueshëm për ndeshjen e nesërme, si dhe për sfidën e radhës kundër Galatasarayt.