Arteta i palëkundur: Premierliga mbetet pa konkurrencë në botë, pavarësisht skandalit të Manchester Cityt

Pavarësisht skandalit të bujshëm financiar dhe akuzave ndaj Manchester Cityt, trajneri i Arsenalit, Mikel Arteta, mbetet i bindur se elita e futbollit anglez mban kurorën e kampionatit më cilësor në planet. Gjatë paraqitjes së tij për mediat, strategu spanjoll ka preferuar të mos hyjë në detaje lidhur me ndëshkimet e mundshme, por ka dashur të vërejë ngritjen e nivelit dhe konkurrencës nga skuadrat e tjera në këtë garë. Kujtojmë se Manchester City ndodhet në qendër të një vorbulle ligjore, pasi një organ i pavarur e ka fajësuar klubin për thyerjen e 114 neneve të rregullores financiare gjatë një harku kohor prej nëntë vitesh, nga 2009 deri në 2018. Aktualisht, drejtuesit e këtij klubi po ndjekin rrugën e ankesës për ta kundërshtuar këtë vendim. Nëse apeli i tyre rrëzohet, dënimet mund të jenë drastike, duke nisur nga gjobat e kripura e deri te përjashtimi i formacionit nga Premierliga. Në këtë klimë tensionesh, Arteta u vu para pyetjeve të gazetarëve, duke qenë se ai ka një të kaluar në “Etihad”, ku ka shërbyer përkrah Pep Guardiolës dhe ka fituar dy trofe si ndihmës-trajner. Pak ditë pasi hodhi firmën mbi një marrëveshje të re katërvjeçare që e shndërron në trajnerin me stolin më jetëgjatë aktualisht në Premierligë, ai shmangoi çdo lloj polemike rreth dëmit të mundshëm në imazhin e kampionatit. “Kemi një proces që ende s’ka përfunduar dhe është në zhvillim e sipër. Besoj se do të kemi një pasqyrë shumë më të qartë pasi kjo çështje të marrë rrugën e zgjidhjes”, u shpreh ai. I pyetur nëse kjo situatë hedh hije dyshimi mbi triumfet e tij të kaluara te “Cityzens”, strategu shtoi: “E kuptoj nga vjen kjo kureshtje. Ka shumë zhurmë rreth kësaj teme, por procedurat janë të hapura dhe duhet t'i respektojmë ato”. Pavarësisht stuhisë që ka përfshirë ish-shtëpinë e tij sportive, besimi i Artetës te vlera e Premierligës mbetet i lartë. I pyetur drejtpërdrejt nëse ky turne vazhdon të kryesojë futbollin botëror, ai u përgjigj prerazi. “Njëqind për qind”, theksoi Arteta. “Sipas bindjes sime, është kampionati më i mirë në botë, pa diskutim, për një sërë faktorësh. Për më tepër, duke qenë se kam mbi dy dekada këtu, jam i sigurt se do të vazhdojë të mbajë këtë vend të parë”, përfundoi ai.