Përgatitjet për Botëror, Kombëtarja e Futsallit luan dy miqësore ndaj Turqisë në Tiranë

Kombëtarja shqiptare e futsallit do të matë forcat në dy ndeshje miqësore kundër përfaqësueses së Turqisë, të planifikuara për datat 14 dhe 15 tetor. Këto takime vijnë në kuadër të fazës përgatitore për sfidat e rëndësishme që i presin kuqezinjtë në “Main Round” të eliminatoreve evropiane për Kupën e Botës FIFA Futsal 2028. Federata Shqiptare e Futbollit ka zyrtarizuar akordin për organizimin e këtyre dy përballjeve në kryeqytet, konkretisht në ambientet e Parkut Olimpik “Feti Borova”. Kjo ngjarje sportive do t'i shërbejë stafit teknik për të vlerësuar formën aktuale të grupit dhe për të intensifikuar punën drejt rritjes së ecurisë në fushë. Sipas kalendarit të publikuar, sfida e parë do të ngrej siparin më 14 tetor, duke filluar nga ora 19:00. Ndërkohë, ndeshja e dytë dhe e fundit e këtij grumbullimi do të zhvillohet të nesërmen, më 15 tetor, me fillim nga ora 15:00. Këto dy testime ndërkombëtare janë konsideruar si një mundësi e artë për përfaqësuesen kuqezi për të fituar pjekuri në arenën ndërkombëtare. Ato shërbejnë si gur prove për angazhimet e ardhshme në “Main Round”, ku Shqipëria është pozicionuar në Grupin 6, nën shoqërinë e Kazakistanit dhe Bjellorusisë.