Kthehet çështja për babanë e Vanjës: Apeli rrëzon lirimin e Aleksandar Gjorçevskit dhe urdhëron rigjykim

Gjykata e Apelit ka lënë në fuqi dënimet me burgim të përjetshëm për Ljupço Palevski-Palçon, Velibor Manevin, Bore Videvskin dhe Vllatko Keshishevin, ndërkohë që ka anuluar vendimin për lirimin nga akuzat të Aleksandar Gjorçevskit, babait të së ndjerës Vanja Gjorçevska. Sipas trupit gjykues, Gjykata Themelore Penale e Shkupit nuk ka bërë një shqyrtim dhe vlerësim adekuat të provave të siguruara nga Prokuroria Publike kundër Gjorçevskit. Gjatë një takimi me gazetarët, përfaqësuesit e Gjykatës së Apelit në Shkup vunë në pah nevojën për një analizë të re të fakteve. "Sugjerimi ynë është që provat të rianalizohen duke u bazuar në drejtime konkrete, ku përfshihen dëshmitë e të pandehurve të dhëna në Prokurorinë Publike, dëshmia e nënës së Vanja Gjorçevskës, si dhe përmbajtja e mesazheve të shkëmbyera në platformën Viber", deklaruan gjykatësit. Në anën tjetër, Gjykata Penale ka bërë të ditur se sapo të pranojë zyrtarisht vendimin, do të ndërmarrë hapat e menjëhershëm për caktimin e seancave të reja gjyqësore për Aleksandar Gjorçevskin. Kujtojmë se ngjarja tragjike e vrasjes së Vanja Gjorçevskës dhe Pançe Žezovskit ndodhi në muajin nëntor të vitit 2023.