Tragjedi në Gjilan: Dy të vrarë dhe një i plagosur në Livoç, dorëzohet i dyshuari

Një ngjarje e rëndë ka tronditur fshatin Livoç i Ulët në komunën e Gjilanit, ku dy persona kanë humbur jetën si pasojë e të shtënave me armë zjarri, ndërsa një tjetër ka mbetur i plagosur, ka konfirmuar Policia e Kosovës. Alarmi për këtë incident tragjik është dhënë rreth orës 14:25, pasi autoritetet morën njoftimin për të shtëna armësh në zonë. Menjëherë pas kësaj thirrjeje, forca të shumta policore bashkë me dy prokurorë të shtetit u nisën drejt vendit të ngjarjes për të nisur hetimet. Gjatë kontrollit dhe ekzaminimeve në terren, policia gjeti pa shenja jete një burrë rreth moshës 30-vjeçare, i cili ndodhej brenda një automjeti. Ndërkohë, në Spitalin e Përgjithshëm të Gjilanit është konfirmuar edhe vdekja e një gruaje, po ashtu rreth të 30-ave, e cila dyshohet se u qëllua për vdekje nga i njëjti person. Përveç viktimave, nga ky sulm me armë ka pësuar lëndime edhe një person tjetër. Pasi mori ndihmën e parë mjekësore në urgjencën e spitalit lokal, i plagosuri është dërguar për trajtim të specializuar në Qendrën Klinike Universitare të Kosovës (QKUK). Në bazë të hetimeve paraprake, autoritetet bëjnë me dije se mes autorit të dyshuar dhe viktimave dyshohet të ketë pasur lidhje familjare, ndërsa rrethanat dhe motivet që çuan në këtë akt të rëndë mbeten ende të paqarta. Në një zhvillim të fundit, i dyshuari është dorëzuar vetë në stacionin e policisë. Gjatë operacionit dhe veprimeve hetimore, autoritetet kanë sekuestruar edhe armën e zjarrit që dyshohet se u përdor gjatë krimit.