Aksion antiterror në Mal të Zi: Vihen në pranga drejtuesit e rrjetit rus “Rybar”

Autoritetet e sigurisë në Mal të Zi kanë ndërmarrë një operacion blic gjatë orëve të para të mëngjesit të së premtes në Risan, duke çuar në arrestimin e pesë personave që dyshohet se bashkëpunonin me rrjetin rus të ndikimit hibrid, “Rybar”. Siç raportojnë burimet mediatike vendase duke iu referuar strukturave të sigurisë, në mesin e të ndaluarve spikatin emrat e Mikhail dhe Valeria Zvinchuk, të cilët konsiderohen si kokat drejtuese të këtij rrjeti, së bashku me tre bashkëpunëtorë të tjerë të tyre. Pavarësisht insistimit të mediave, deri në këto momente Drejtoria e Policisë, Agjencia për Siguri Kombëtare (ANB) dhe organet e akuzës në Mal të Zi kanë ruajtur heshtjen, duke mos ofruar ende një koment zyrtar mbi operacionin në fjalë. Një komunikatë zyrtare nga institucionet kompetente malazeze pritet të hedhë dritë mbi detajet e këtij aksioni të bujshëm në ditët në vijim. Për sa i takon vetë organizatës, “Rybar” funksionon si një platformë mediatike dhe informative ruse, e ngritur në vitin 2018 nga vetë Mikhail Zvinchuk, i cili më parë ka shërbyer në strukturat e marrëdhënieve me publikun pranë Ministrisë së Mbrojtjes së Rusisë. Me nisjen e agresionit ushtarak në Ukrainë, ky rrjet u shndërrua me shpejtësi në një nga kanalet më kyçe dhe me ndikim të lartë në platformën Telegram për përhapjen e narrativave proruse. Kufizimet ndërkombëtare ndaj themeluesit të tij datojnë që nga viti 2023, periudhë kur Bashkimi Evropian vendosi sanksione ndaj Zvinchuk për shkak të mbështetjes aktive ndaj fushatës ushtarake ruse në Ukrainë dhe përhapjes së dezinformimit. Brukseli zyrtar thekson se ai bën pjesë në një grup të posaçëm pune të krijuar nga kreu i Kremlin, Vladimir Putin, me qëllim harmonizimin e proceseve të mobilizimit ushtarak. Nga ana tjetër, Uashingtoni dhe Londra e kanë cilësuar vazhdimisht “Rybar” si një instrument të përfshirë në operacione keqdashëse të ndikimit të jashtëm dhe fushata dezinformimi. Si dëshmi e rrezikshmërisë së pretenduar, në vitin 2024 Departamenti Amerikan e Shtetit, përmes nismës “Rewards for Justice”, vuri në dispozicion një shpërblim prej 10 milionë dollarësh për këdo që do të siguronte të dhëna rreth individëve që operojnë nën ombrellën e “Rybar”. Gjatë periudhës së fundit, aktiviteti i këtij rrjeti ka shënuar shtrirje edhe në hapësirën e Ballkanit Perëndimor, duke u evidentuar paraprakisht në shtete si Serbia dhe Bosnje e Hercegovina.