Konjufca nga Sofja: Serbia po bllokon energjinë elektrike për Kosovën, kërkohet reagimi i BE-së

Kryediplomati kosovar, Glauk Konjufca, gjatë pjesëmarrjes në Konferencën Ndërkombëtare për Korridorin VIII në Sofje, ka denoncuar sjelljen obstruksioniste të Serbisë. Ai ka theksuar se Beogradi po vazhdon të krijojë pengesa në shkëmbimet e energjisë elektrike me Republikën e Kosovës, duke shpërfillur haptazi afatet e përcaktuara nga Komuniteti i Energjisë. Nëpërmjet një njoftimi zyrtar, bëhet e ditur se Konjufca u ka bërë thirrje institucioneve evropiane që të ndërmarrin masa konkrete dhe vendimtare për të garantuar zbatimin e marrëveshjeve. Ministri paralajmëroi se këto bllokada të vazhdueshme nga pala serbe po rrezikojnë seriozisht qëndrueshmërinë dhe sigurinë energjetike në të gjithë rajonin. Në vijim të fjalës së tij, Konjufca vuri në pah domosdoshmërinë e integrimit të plotë të Kosovës në rrjetet rajonale. Ai nënvizoi se projektet strategjike, siç janë modernizimi i Linjës Hekurudhore 10 dhe ndërtimi i hekurudhës Prishtinë–Durrës, janë jetike për forcimin e ndërlidhjes, diversifikimin e rrugëve tregtare dhe konsolidimin e sigurisë euroatlantike në Ballkanin Perëndimor.